美股前晚拗腰倒升401點，但未能令港股隨同造好，昨日大市盤後競價時段更急跌多200點，收報14554，重挫676點或4.4%。內銀股被拋售，純睇建設銀行（939）咁樣被狂沽，若說有策略股東偷步在禁售期前沽定先都有人信！建行昨收3.50元，跌6.7%。
本地銀行股亦受可能要向雷曼迷債苦主作回購的影響，表現普遍不濟，其中大新金融（440）跌得最恐怖，急瀉12.7%至22元。綜觀而言，短線中港銀行股均會受壓，可待大市跌定之後才伺機低吸作中長線投資。
大摩睇新濠見3.1元
以前有人話生意淡薄，不如賭博，但濠賭股年內受大陸限制簽證影響，早非股海焦點，縱使澳瑪娛樂（959）發盈喜刺激股價勁升，但昨日即回跌28%重返0.14元。不過，大摩卻適時發表報告，語調睇好濠賭業，並首次將新濠國際（200）納入研究範圍，給予目標價3.10元。
大摩睇好其一理由，係根據美國經驗，得出經濟衰退時期，博彩業收入不跌反升，還假設內地限制簽證措施將於09年底撤去，故預期09年至2011年澳門博彩及地產業年複合增長可達11%。經濟差，「阿爺」重新放寬旅遊限制救澳門一啲唔奇，但估到明年底先有望撤銷限制，就似乎「估」得太遲，家陣咁環境，要買都唔使急喇。
方星俠