郭晉安今年初當上爸爸後，有仔萬事足，那份喜悅無可取替，但小生命誕生後，安仔仍要不斷工作，很少時間陪伴妻兒，直至近日才有空享受湊仔樂。安仔最難忘兒子牙牙學語、一篤便會笑的時刻，令他與太太歐倩怡增添不少家庭樂趣。
郭晉安素來有乖乖仔稱譽，無論在事業或家庭都保持好男人形象，他近日放假在家中休息，在這段小休假中，安仔最喜悅的除了欣賞到自己主演的劇集外，最開心是可以百分百享受爸爸生活。
「眼仔睩睩似老婆」
談到兒子Brad，安仔即笑不攏嘴說：「我11月先開劇，呢段時間湊仔為樂，BB七個月大，開始出牙仔，成日流口水牙牙學語。我同太太都好怕唧，BB都遺傳咗，一篤吓佢，佢就會哈哈笑，然後眼仔睩睩望住我哋，似足老婆，真係好可愛，所以呢段時間好開心。」
安仔初為人父時，要出外公幹心急得要命，他說：「試過由上機就諗到個仔落機，好後悔點解接咗個job，又試過推工作，經過一段時間先可以適應，𠵱家去幾日都OK，但唔會去太耐。」
無綫現正播映安仔主演的劇集《與敵同行》，他飾演大反派唐立言與鄭嘉穎飾演的張承希大鬥法，安仔的角色奸到出汁，也是他近十年唯一演出的奸角。雖然《與》劇風頭與收視顯然不及之前的《溏心風暴之家好月圓》，但對安仔而言卻是一個突破，他說：「我喺十年前《笑看風雲》做過反派，呢套劇係少咗一份輕鬆同幽默，但我覺得自己成功咗，出街後多人驚咗我，因為戲裏面我奸到好邪惡，好工心計同利用智慧去殺人，大結局場面係我入行20幾年前所未有咁震撼，我會得到大懲罰，會令人好心寒。」
「受歡迎已經滿意」
可惜《與》劇收視未如理想，安仔坦言：「我明白收視一定唔會似《家好月圓》迎合大眾，但我相信有啲家庭觀眾睇到我哋《與》劇嘅演出都打個突，會有疑問點解阿旺會變成咁。只要受歡迎我已經滿意，收視我控制唔到，但我絕對相信單係人物受歡迎程度，唔比阿旺遜色。」
採訪：卓寶花 攝影：葉君海
化妝：May
髮型：Niki@Headquarters
場地：BeiraRio（鯉景灣）