寫Blog流行咗好幾年，但對於仍以書信、傳真同電話嚟聯絡嘅梵蒂岡教廷嚟講，應該係「高新科技」。廿幾個教廷聖部嘅領導人，加埋來自全球嘅樞機、總主教、主教等200幾位天主教會領袖，正喺梵蒂岡開馬拉松式世界主教會議，香港主教陳日君樞機做當然成員，教廷更委任咗一位香港女信徒做旁聽員。
呢位女士面對一眾前輩毫不怯場，會上向200幾位教廷要員建議教宗應該追上潮流，開個Blog嚟寫吓，內容隨教宗喜愛，可以用唔同語言講述每日讀經同埋反省，據講教廷高層聽到反應正面，覺得好有新意、好欣賞咁話。
提出呢個「前衞」建議嘅女士叫林錦玲，係香港天主教聖經協會會長。