轆book：偈細馬力大<br>272匹飆得寸得

轆book：偈細馬力大
272匹飆得寸得

AudiTT車系性能旗艦車TTS正式登場，同樣係2.0公升引擎，馬力提升至272匹，仲要有Turbo兼有四驅quattro，獨特線條，就算全身鮮黃色，離遠睇住佢飆過都唔會認錯係Porsche，搶眼又獨特，絕對寸得起。

記者：梁美甜
攝影：譚盈傑
Model：Kiko@StageModels

■TTS係性能車種，起步加速零舍快過人。

■雙出尾喉，跑車一貫格調。

■內裝鋪排唔算得上豪華，但依然有先進科技設備以及動感。

0-100公里5.4秒

就算係TT3.2都只係得250匹馬力，全新超性能版本TTS一出，引用TT入門版2.0公升引擎，經調校之後，馬力即時大提升，飆升Over30％馬力，高達272匹力，成為旗艦車之餘，更絕對可以加入超級跑車行列。
TTS有2+2Coupe同埋Roadster敞篷兩種車型，兩款車副偈都係2.0公升TFSI，工程師分別對汽缸、活塞、增壓渦輪、進氣排氣率等等作出調校、修改以及強化之後，搭配六前速Stronic連軚環加減撥片同埋招牌Quattro，新車性能即時大提升，起步加速尤見功力，隔籬部車起步時，TTS已經去到街尾要踩Brake，寸到爆。但無計，部車由靜止加速至100公里都只需要5.4秒時間，起步快根本係本能，去得無理由唔去㗎！最誇嘅係見到咪數錶可以去到300公里，呢個數字絕對吸引，之不過喺香港似乎無咩用武之地嘞！
全新TTS源出TT車系，外形上與TT車形分別相若，但鬼臉罩欄柵就同TT車型唔同，掛番個TTS標誌，加上全車包圍，感覺比TT更具肌肉感，當中最大分別莫過於新式嘅LED日間照明燈，秉承新車特色，同樣電到你暈！

■內藏式尾翼恍如其他德國跑車。

■新式鍍鋁側鏡連指揮燈。

■18吋輪胎夠晒大，連TTSBrake碟，又寸又型。

■後排摺起仲誇，WakeBoard都放得落。

超矚目型仔車

試車當日用嘅係Coupe硬頂版，搶眼到暈，由香港仔跑出銅鑼灣再上渣甸山，沿途無論係坐車嘅抑或喺街嘅人都係咁望，就連師奶仔行過都回望幾眼，仲口噏噏：「TT喎！」Sorry，呢部係更勁嘅TTS，不過師奶仔已經好識貨喇！無可否認，𠵱家真係多咗Audi車喺街行，唔再由Benz嘅SLK、BMW嘅Z4、PorscheBoxster專美，當成日見到街上飆過SLK或者Boxster嘅時候，突如其來飆部TTS更令人驚喜同矚目。