王菀之（Ivana）剛推出新大碟《InfinityJourney》，其中一首主打歌就花了至少6位數字於英國的錄音室混音，Ivana希望籌備下張大碟時可以飛去外地搵創作靈感，Ivana又自爆經常在錄音室發脾氣，更試過與監製鬧意見，因而撕爛歌紙及瞓地發洩。
王菀之剛推出的新大碟特別之處是翻唱她作給其他歌手的歌曲，當中包括有《小黑與我》、《多愁善感》以及《戀上你的床》等等，Ivana表示翻唱自己的作品是因為出於懷念這些歌曲，她說：「我真係好掛住自己作畀其他人嘅歌，於是就喺呢一隻新碟揀咗幾首翻唱，將來再寫多啲歌嘅時候，我希望再推出一張自己嘅作品集，呢張碟係見證自己嘅成長歷程。」
望赴外國搵靈感
大碟中的作品《我來自火星》（InfinityJourneyMix）更是Ivana最喜愛的一首歌，因為唱片監製主動提出於英國混音，只是製作這首歌的混音費已花了近6位數字，她說：「我嘅監製飛去英國做呢首歌，嗰間錄音室係Bjork去錄音嘅，雖然我冇見過佢，但用埋同一個錄音室已經好開心。」Ivana希望籌備下一張大碟時可以飛到外國兩個月作歌，之後再於外地錄音，她滿心歡喜地說：「到時我想去外國搵靈感，用兩個月去寫歌，之後用一個月時間去錄音，唱片封套我就會自己影埋相，呢個係我夢想，不過我驚一同公司提出，老闆答我唔得。」
與監製缺乏共識
當Ivana談及錄音時的經歷時，她自爆在錄音室經常發脾氣，她說：「平時大家都覺得我好斯文，其實我啲火喺錄音室先會爆發出嚟。有一次錄一首歌同監製冇共識，我唱到冇晒心機又好嬲，於是撕爛晒啲歌紙唔唱。又有一次佢想我唱另一種感覺，但係我覺得出嚟效果唔會好聽，佢迫我唱我咪唱囉，後嚟我瞓咗喺地一個鐘。」
採訪：李珮洳 攝影：陳志嵐
化妝：Jenny
髮型：BillyChoi（HairCulture）
