台慶頒獎禮之男配角篇
無綫台慶《萬千星輝頒獎典禮2008》下月15日舉行，29歲的梁烈唯憑劇集《尖子攻略》演學生哥獲提名最佳男配角和飛躍進步男藝員。原來他早於10年前已擔正主演電影《監獄風雲之少年犯》，可惜市道低迷，工作銳減，如今終在TVB捱出頭來。 撰文：楊潔雯
憑無綫劇集《尖子攻略》獲提名最佳男配角及飛躍進步男藝員的梁烈唯，19歲出道已擔正做男主角，拍其第一部電影《監獄風雲之少年犯》，當年他以為自己要風得風，他說：「嗰時覺得好威呀，自己有部電影做主角，又唱主題曲，個人飄飄然，就好似一般年輕人咁發明星夢。」
「嗰時好憎蔡一智」
可惜電影市道低迷，一年後梁烈唯的工作銳減，已無人記得他，他說：「頭一年好易搵錢，之後開始冇嘢做，個人就沉晒，冇嘢做咪靠屋企，就咁過咗四年，我記得嗰時蔡一智同我講，我問佢我做乜好，佢話：『我唔覺得你有乜嘢條件做呢行，你去做7-11就差唔多！』嗰時真係好憎佢，大家係朋友唔使咁講呀！𠵱家就知道係激將法，諗番起都覺得好好笑。」
梁烈唯在娛圈浮沉10年，最幸運是有一班對他不離不棄、不斷鼓勵他的好朋友。03年他加入TVB，是陳敏之穿針引線，他說：「喺沉底嗰時，敏之見我冇嘢做，忍唔住幫我掟資料過去TVB。」於是他在TVB由低做起，他說：「入到TVB呢個龍潭虎穴，開始認識自己，愛自己，以前覺得自己唔矮，幾靚仔，𠵱家大把人靚仔過我，高過我，而且我知道太靚對一個演員嚟講係一個缺憾，喺TVB五年同樣經過起跌，有日突然有個助導搵我，話有個債仔角色畀我做，我嗰時豁咗出去，決心要做個出色嘅債仔，果然做完呢個債仔之後，真係有監製搵我，可以做《賭場風雲》後生版Bobby（歐陽震華），我真係好開心，我堅持嘅努力冇白費，今日我仍然深信自己做咗一個出色嘅債仔。」
最想攞飛躍進步獎
梁烈唯終憑《尖子攻略》提名最佳男配角及飛躍進步男藝員，梁烈唯慶幸努力有人看到，他說：「好開心，好似已經攞咗獎咁。」他睇好黎耀祥奪最佳男配角獎，他最想得到反而是飛躍進步男藝員獎，他說：「攞男配角獎會害死我，飛躍獎我知道其他候選人都好強，但係網上討論區投票，我都有第三位，所以我都唔係完全冇信心。」
攝影：葉君海
最佳男配角提名名單
徐榮 《同事三分親》
歐錦棠 《同事三分親》
郭政鴻 《野蠻奶奶大戰戈師奶》
黎耀祥 《秀才愛上兵》
秦沛 《和味濃情》
馬國明 《太極》
李思捷 《原來愛上賊》
周驄 《溏心風暴之家好月圓》
梁烈唯 《尖子攻略》
羅仲謙 《尖子攻略》
飛躍進步男藝員提名名單
王祖藍、李思捷、徐榮、郭政鴻、梁烈唯
資料來源：無綫電視
人物誌：出身綠葉世家
現年29歲的梁烈唯，伯父是綠葉王梁家仁。99年出道參演《監獄風雲之少年犯》、《頭號人物》和《驚天大逃亡》等。03年經陳敏之穿針引線簽約無綫，參演劇集《青出於藍》、《心花放》及《秀才愛上兵》等。礙於形象所限，常被派演蠱惑仔、不良學生等角色；直至《尖子攻略》飾演「基謹三寶」之一，令人刮目相看，現忙於拍攝新劇《烈火雄心Ⅲ》。