民主黨度出「借屍還魂」好橋，噚日終於成功通過動議，成立可以引用《立法會（權力及特權）條例》傳召銀行高層交代事件嘅小組，追究雷曼迷債事件。上次投反對票嘅民建聯，今次轉軚投棄權票，代表銀行界嘅東亞寶哥哥，投票時唔見人，到表決完塵埃落定先匆匆進入會議廳。
八方見寶哥哥坐低未唞順條氣，就細細聲問旁邊中指黃，似乎想知道情況如何。佢係銀行界代表，喺呢個針對銀行界嘅問題上理應投反對票，不過群情洶湧，冇理由公然與民為敵，遲到趕唔切投票，都不失為一個甩身妙着。立法會內務委員會噚日亦通過成立專責委員會調查梁展文事件，由於民建聯競選時表明支持，唔敢反口，所以好順利大比數通過。