唔辛苦點得世間財呢？港、九華仁校監周守仁神父、港華校長譚兆炳、九華校長蘇中平為咗幫華仁一家基金會籌款，一齊出動參加09年渣打馬拉松十公里挑戰賽。
幾位華仁高層擔子唔輕，每人要孭50萬數，為免中氣不足半途而廢交唔出數，校方特別邀請「沙士英雄」鍾尚志教授幫佢哋集訓，六堂特訓班聽日開學，參加呢次比賽嘅其他校友、學生都可以參加。基金會副主席吳天海、立法會議員梁家傑據講已經報名，幾十個華仁仔都會到場學嘢。鍾教授人到中年先開始練習長跑，𠵱家已經係「長氣袋」，曾遠赴南非參加全長84公里嘅超級馬拉松，今次會教師兄弟跑步秘訣，親身示範長跑攻略。