英國《太陽報》搞嘅全英最乞人憎球員網上選舉有結果啦，車路士嘅艾殊利高爾（A高爾）以29%支持率力壓得27%嘅祖爾巴頓。就算冇車震、自拍，A高爾明明有個索老婆仲出去偷食，淫賤反骨兼樣衰，呢鋪都算大熱勝出囉。
背叛兵工廠後運勢跌
所謂憎人富貴嫌人貧，當年A高爾貪圖富貴，背住阿仙奴同死對頭車路士斟轉會，繼而過檔，典型反骨仔當然被唾棄，由嗰刻開始形象衰晒。佢好命水，老婆係當年喺「最性感球星伴侶」排行榜排首位嘅英國女子組合GirlsAloud成員雪露（CherylTweedy），令萬千男士流口水；又曾試過同老婆公開啲浮誇合照晒幸福，阿水都憎。
幸福背後，原來佢愛蒲愛滾，專摘路邊野花，抵俾老婆兜巴聲。最賤仲係被踢爆鍾意SM，搞嘢時慣用戴住結婚戒指隻手打人屁股，仲有幾筆唔帶避孕套嘅風流賬，搞大人個肚後又唔敢蒲頭，要搵經理人同人講數了事。我求大俠忍唔住要引用賭王農曆年間鬧呀希仔嘅金句「賤過地底泥！」嚟鬧呢個賤男掌門人。
人賤都算，最慘唔見得好波，近年落場冇佳作；上個禮拜英格蘭對哈薩克，佢失驚無神自大扮勁橫傳個波去心臟地帶累英軍失守，呢球波球迷入晒腦，想洗底都難。唔怪得連國家隊隊友謝拉特都唔撐佢，話球迷柴佢台係啱嘅。
C朗靚仔有錢惹人妒
第2位嘅祖爾巴頓不嬲格衰又打隊友達保，當日佢入冊時簡真係萬人稱快，再睇佢身邊幾個身形魁梧、笑得陰陰濕濕嘅獄友，我一方面擔心佢會俾人糟質，一方面想笑。至於第3位係得24%嘅基斯坦奴朗拿度（C朗），點解咁乞人憎？我估未必因為佢成日鬧離隊，而係鬼叫佢靚仔有錢又多女，係人都妒忌啦。