唉！上期戈亞斯同玻利維亞任我揀，結果《早飛2+5》推介戈亞斯，小弟專欄《畢賭翁》就揀咗玻利維亞。最後早飛賴晒嘢，《畢賭翁》就保持強勢7個禮拜全贏。為咗挽回本欄分數，今期推介最熟嘅西甲，要周日艾美利亞主場贏西維爾，平手冇得輸。
西軍要靠「防中」打箭頭
拍檔牛兄外遊返嚟果然叉足電，周中國際賽大大聲貼俄羅斯[-1]，結果贏芬蘭3:0。畢傑今次又做主打，決定搵西甲地盤再揚威。西維爾聯賽4勝2和未輸過，但呢個禮拜佢哋相當「擇駛」，就係冇前鋒用！相信攻力同之前幾場比，肯定弱咗好多。
西維爾先有簡路廸因傷缺陣3周，長期養傷嘅干尼又唔使預佢；至於早前最「弗」嗰位巴西前鋒路爾斯法比安奴，因傷已經冇份代表國家隊打世盃外，家陣仲未可以復出，而打完國際賽整傷咗嘅烏拉圭射手捷雲頓，據報傷勢得雖唔嚴重，但上陣機會都唔大。即係話，西維爾4名前鋒都唔可以上陣！
球迷或者會問，足智彩〈球員資料〉一欄仲有個「前鋒」羅馬歷喎；不過畢傑可以同大家透露，羅馬歷最佳位置係中場，佢本人都話防中先最啱踢。咁就死啦，聽西維爾教頭占美利斯賽前話，由於球隊冇前鋒好用，羅馬歷周日場波會打單箭頭喎，講真成隊火力唔強得去邊囉。
艾軍上季對賽全勝
仲有呀，西維爾仍然有大把傷兵，中場靈魂廸亞高卡普、後衞荷西基斯普、德古天奴域及莫斯基拉全部唔出得，艾廸安奴同法斯奧周中先傷癒復操，我睇成隊都唔慌踢得好。
主隊艾美利亞有強隊殺手之稱，上季主場贏過維拉利爾同皇馬，對住巴塞、馬體會都唔使輸。唔止呀，上季兩循環都可以擊敗西維爾，分別作客贏4:1及主場贏1:0，點計都冇得輸。何況艾美利亞有射手尼格度大勇外（6場入5球），又有卡勞烏捷及捷高復出，平手重槌啦！
過關腳信我嘅，要有3名主力停賽復出嘅維爾瓦，作客華拉度列不敗開[+1]嘅「客勝」；另巴甲維多利亞迎富明尼斯續追「大」。
周末早飛超級重心
星期六22
拜仁慕尼黑勝[-1]
拜仁已與「衰波」畫上等號，不過喜見中場列貝利在法國隊復勇兼有入波，作客3連勝的卡爾斯魯厄，信多拜仁一次。
星期六65
巴黎聖日耳門勝
聖日耳門以穩行先，陣中老兵如馬基列尼、古利不用出戰國際賽，休息充裕可挫作客甚差的羅連安特。
星期日39
華倫西亞勝[-1]
華倫西亞重拾昔日霸氣，暫居榜首絕非僥倖，前鋒韋拿在國家隊亦有建樹；紐文西亞爆冷挫巴塞隆拿後，已無以為繼。
難啃早餐
星期六16
米杜士堡勝[+1]
米杜士堡屬強隊殺手，近3季主場對車路士取得2勝；車路士國腳如雲，艾殊利高爾、祖高爾、廸高、安歷卡等主力均缺陣。
〈早飛倉〉
主菜：星期日55艾美利亞（平）@1,300
渾水摸魚過關：星期日39華倫西亞勝[-1]（1.95）x星期日40維爾瓦勝[+1]（1.85）x星期日52維多利亞大（待定）3x1@200
今日早餐價錢：-$1,500
上日賺蝕：+$450
早飛倉結餘：$91,085
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。