SportsWear變時裝，不是和平的進化論，而是革命和鬥爭，最近還進入白熱化階段。即使係同門，一樣照爭，眼見姊妹牌adidas上次搵來亞洲天后孫燕姿撐場，今次Reebok一樣有本地薑天后級人馬容祖兒落力跳躍登場。想由運動服跳到變成時裝，看來Reebok這一跳，都要跳得幾用力！
記者：葉雪芯
攝影：林栢鈞
ClassicRetroSpain桃紅色有帽外套$380、ClassicRetroPods黑色運動長褲$280、ClassicRetroPodsHexAccomplice運動鞋$450
天后時裝觀：睇顏色
時裝世界永遠是又真實又殘酷的。Reebok近年一直被套上「沉寂一排」、「曾經風光」的字眼，作為Fans當然為之抱不平，要翻身，大力一跳希望追得上其他Sport牌大阿哥亦無可厚非。今次搵來天后級容祖兒（Joey）落場一跳，唔止因為貪佢跳得夠高，仲係因為天后本身的情意結，Joey說：「讀書年代已經好鍾意着Reebok的運動鞋，尤其至經典的ReebokFreestyle鞋，每季有新款必追，仲會𦧲阿媽買畀我。」不過講到Joey的衫字經，對款式她沒有太大的限制，原來天后最看重的是顏色，「秋冬一般都是沉重的黑灰色，但我的時裝理論就沒有這條規矩。因為我本身性格屬於樂天派，鍾意笑，所以一些代表開心的顏色會特別喜歡，如粉紅色、紫色或紅色等，冬天照穿，除了令自己開心亦可感染身邊的人！」
不愛跑步機愛踩單車
懷緬過去，不如Moveon向前看。Reebok點會唔深明此道，今季秋冬女裝運動服系列用了「YouMove」來做主題，講到明以動感、活力行先，形象Young了不少。跳跳紮與Joey幾乎可以劃上等號，原來她也是運動迷，不過非如其歌《跑步機上》，「我做運動有時簡直去到沉迷程度，羽毛球、單車是我強項，玩幾個鐘都唔會攰。尤其愛踩單車的速度感，永遠不斷的向前衝，一邊睇風景，同時Enjoy運動後一身熱汗感覺，勁有成功感！」
繼續玩Freestyle
今季Reebok秋冬女裝運動服系列，主要是以戶外及戶內的Fitness運動而設，設計當然少不了招牌的Freestyle元素，款式包括有極易襯、英國國旗為藍本的衞衣，混合今季大熱毛領款式的夾棉毛領背心外套，Must-haveItemsList長年上榜的Zip-up運動套裝和冬季實用的羽絨外套等。
Backstage：跳到痛
今季Reebok廣告中Joey穿上Training兩款秋冬女裝運動服飾登場。翻身之作當然揼本，揀選韓國著名TEOStudio進行拍攝，仲搵來英國著名導演SimonProcter擔任廣告導演兼請來兩位韓國Dancers齊齊跳。Joey與Dancers需要不斷重複做出多種凌空跳躍動作，拗腰、跳起，再拗腰、跳起，拍足五個鐘，連擁有舞蹈底子的Joey都坦言拍攝後感覺腰痠背痛，為至愛Sport牌，痛都抵啦！
Reebok專門店（27367010）
尖沙嘴海港城海運大廈2樓OT271號舖
