全球股市進入熊市，地產市道都走唔出陰霾，趙世曾檔卓能集團（131）08年度業績，生意縮近三成，全年賺少23.6%。不過，華華噚日揭開卓能份新鮮出爐嘅年報，趙氏父子──趙世曾同趙式浩照樣有人工加，趙世曾仲加近一倍㖭。
阿仔都漲七成幾
趙世曾喺主席報告度都有話：「預期本港地產市場將會降溫」，又指「集團將面對非常艱難的一年，但長遠來說前景仍將是良好的。」呢頭話嚟緊呢年大家要捱世界，嗰頭佢就加人工，由舊年嘅167.5萬銀，大增98%至332.2萬銀。唔通集團預期嚟緊呢年，主席要出多啲腦力應付難關，所以畀啲甜頭先？
至於加入集團只有兩年半左右嘅趙式浩，舊年總人工32.4萬銀，今年加七成幾至56.3萬銀，以初出茅廬嘅廿幾歲仔嚟講，平均每個月𢭃五皮嘢，人工唔錯㗎啦。