議員在十月十三日連番向財經高官發炮，睇落啲高官相當難頂。以事論事，左丁山素來認為任志剛嘅年薪，唔值得比伯南克高幾倍，亦一開始就反對任志剛推動成立香港按揭證券公司，此外，左丁山反對設立聯繫匯率多年，反對九八年政府救市（因此曾在電台畀人鬧為漢奸），所以有時在馬場碰到任總，往往擦身而過。
但係以事論事，睇電視直播立法會議員狂批財經高官，任總表現得最鎮定，最懂分寸。佢捱到下午六點，面有倦容之時，劉慧卿與劉江華指雷曼迷債若果再拖落去，會影響市民對銀行信心。任總答得含蓄而明智，佢大意話香港銀行制度保護存戶，最重要係存戶有信心。旨哉斯言，銀行經營的第一個原則就係向存款客戶負責，不能讓擺錢於銀行之人有損失，否則嘅話，一聲擠提，社會大亂。因是之故，銀行唔係做善堂，追債不遺餘力，落雨就會收遮，係銀行家嘅本性。美國銀行舊總部位於三藩市，座大廈（電影《沖天大火災》場景）好有威勢，街上有一座雕塑，係三藩市地標之一，就係一件大型心形物件，黑色嘅。故有黑心BlackHeart之名，美國銀行肯接受藝術家嘅「黑心雕塑」，固然係自嘲，亦暗含深意。對一啲社會左派嚟講，銀行追債，收樓，高息貸款，賣產品而累街坊，仲唔係黑心壞人咩。任總講銀行信心，只談存戶，好嘢，識嘢！
議員又鬧金管局做嘢慢，長毛鬧曾氏兄弟唔做嘢。任總回答話，如果講實在，慢啲會仲好。因為現在雷曼啲蘇州屎仲係好臭，估值亂晒龍，遲啲嘅話，歐盟救市，英國救銀行，美國買不良資產，個市場定一啲，基金界冷靜番，對CDO、CDS可能會出一個更好價錢買入。任總之言，係要具備豐富經驗與洞悉力，先至敢講出嚟嘅，佢如果扮精仔，可以唔講啫。今日十月十七日，係香港成立聯繫匯率二十五年紀念日，左丁山本來想講聯繫匯率，但見任總在立法會越戰越勇，堅守原則，忍唔住讚番佢兩句先。