放心，靚女唔係自殺，佢食完糖開心到飄飄然啫；又放心，佢揸住嗰樽唔係安眠藥，唔係搖頭丸，係包裝到藥丸咁款嘅糖果同朱古力啫。未食，睇包裝同服用說明已經笑爆嘴。咁多搞鬼藥丸，以包小人棉花糖最受歡迎，呢個世界真係咁小人當道？
記者：周靜雯
攝影：陳盛臣
鳴謝：全人發展中心臨床心理學家施凱兒、異國風精品酒店（23386222）
心情即時變靚
嗱嗱嗱，睇得呢篇稿，請先拋開減肥瘦身包袱，啪粒糖食塊朱古力𠱁自己開心，偶一為之唔過份啦。
首先要知道，當人面對壓力，腦部會自動分泌皮質醇，話明自動，即係無得避！皮質醇一出現，身體維他命B會減少，導致肌肉緊張、難以提起精神，壓力帶嚟嘅煩惱就更負面。唔想皮質醇增多，始終都要靠自己，要盡量放鬆心情，再唔掂，可以食粒糖或朱古力，心情都會即時變靚。朱古力由可可豆製成，可可豆含咖啡因同苯丙氨酸，人吸收呢兩種成份，短時間內會清醒頭腦，繼而做事爽快，心情自然靚晒。要揀，首選黑朱古力，其次牛奶朱古力，最後先數到白朱古力，有時撞正腦閉塞寫唔到稿，人Down無Mood，啪番粒朱古力真係當堂醒一醒。食糖又點解令人興奮？因為糖果含糖份，令人體血糖上升，腦轉數快啲，同樣有醒神功效。
啜核包裝
包小人棉花糖
小人出現必食：有效驅散辦公室咒怨，小人出現時食用，有助保持心境開朗。造型似紙尿片，仲要係XS加細碼嗰隻，粉紅襯白包裝，以為係士多啤梨味，食過先知係朱古力味。
偶蜜碼衞生棉花糖
想開心必食：藍色包裝似乜？唔使講到明嘞啩，食番粒，享受百分百安全感，若出現心情愉快現象，應告知死黨讓開心加倍。藍莓味夾心，話就話係棉花糖，但糖身較韌，唔覺點綿法。
噓噓礫
嘈嘈閉必食：又玩紙尿片造型，仲寫明適用年齡0至100歲，食完歡樂指數增加100%。童年時代嘅口笛糖，方便大家O嘴嘈嘈閉，對準空心窿位一吹響到爆，粒糖有兩隻色，好靚。
致命毒藥
糖衣毒藥
毒死哀愁必食：強力殺「愁」毒藥，能追擊體內鬱悶細胞。橡皮糖顏色鮮艷，骷髏頭好搶眼。
安樂死
提升快樂必食：將失戀、失業、失敗等不快情緒安樂死。糖呈腰果形，似明X橡皮糖。
豐乳丸
心胸鬱結必食：招紙肉騰騰好誘惑，食完短時間變身F-Cup──胸襟，凡事都會睇開啲。橡皮糖有咬口，感覺食極唔完。
偉哥
死晒火必食：唔好誤會，醫唔到你想硬嗰幾吋，專治腳仔軟無鬥心，增強處事爆炸力同自信心。味道略甜，可以一試。
扮成藥
唬標萬金有
受傷必食：六角形包裝盒、老虎頭Icon，襯埋隻色，真係勁似X標萬金油，專治情傷、小人傷、窮光蛋傷、老闆傷，受乜傷即啪即掂。軟糖彈力好，一於當佢仇人咁出盡力咬，包你話爽。
急品正路玩
精神緊張必食：似唔似喇叭牌正露丸？效力說明超搞笑，專治「事業中驚、愛情吐奶、消息不良、做事臨尾香」，大人每次啪三粒最有效。粒粒軟糖好好𡁻，食到唔停口嗰隻。
先逃牌通稿玩
記者打稿必食：專治因趕稿導致唔夠瞓、自信插水、小肚腩、無心玩樂等病痛，想效果好啲，食完再加30分鐘按摩，幾難寫嘅稿都可以準時交。七彩果汁味，味道甜咗啲，啱女仔食多啲。
驚十次會常要
爛Gag王必食：內含「冷場劑」成份，完全杜絕冷場細菌產生，特別適合笑話不良、廢話過多嘅朋友服用。扭開樽蓋，裏面有一支支果汁糖，方便分畀朋友一齊嘆。
搞鬼朱古力
免俗哩答噗
頭暈身㷫必食：綠色方盒包裝，勁似曼XX敦摩擦膏，專治小人叮咬、戀愛受傷、被豬頭老闆所傷、精神不順、被八卦流言中傷等傷病，對骨瘦如柴及放棄減肥者有奇效。粒粒朱古力Size適中，慢慢嗒最正。
擺爛氏機精
詐儍扮懵必食：服用後，你思緒會變得呆滯，變身詐儍扮懵高手。綠色樽身造型勁似白蘭X雞精，朱古力豆五顏六色，豪啲，成樽倒晒入口啦。
街訪
問題：
A.你鍾唔鍾意食朱古力、糖？（1分最低，10分最高）
B.信唔信食朱古力同糖會開心？
A.3分
B.唔信，因為本身唔多鍾意食糖。我鍾意包小人棉花糖，攞包大人個名開玩笑，好過癮。
A.7分
B.信！食完好開心，不過之後有罪惡感，因為會肥。我鍾意安樂死果汁糖，個名好抵死。
A.5分
B.唔太信，因為聽過食得糖多會生Cancer。包小人棉花糖唔錯，包裝好似紙尿片。
A.7分
B.雖然都幾鍾意食朱古力，但唔太信。我會揀包小人棉花糖，淨係個包裝都笑死人啦。
A.7分
B.少少信，因為我曾經睇過相關Research，話朱古力可以減壓。我揀包小人棉花糖，好味。
殿堂Donki
（旺角彌敦道潮流特區2樓208號舖/81014788）
