周麗淇（Niki）、鄭少秋同鄧健泓噚日喺西貢為電視劇《桌球天王》拍攝煞科戲，Niki接受訪問時就俾記者追問同鄭嘉穎五年情係咪玩完，因為鄭嘉穎之前接受本報訪問時話已經有半年冇同女方聯絡，不過Niki聽完後就好錯愕咁反問︰「佢真係咁講？」問佢到底係唔係事實時，佢話：「呢半年我哋有聯絡同見面，佢亦有打過畀我傾番啲新聞。會唔會係聽錯定理解錯呀？唔知佢（鄭嘉穎）點解咁講。」
秋官：大家食蕉
講到兩人關係，Niki就強調大家係同事同朋友，所以就算見面都唔會尷尬，但問到想唔想再合作，佢就好快咁話：「諗吓先啦，因為我都要出唱片做宣傳，合作遲啲再算啦。」問佢今日喺鄭嘉穎屋企（西貢）附近開工會唔會有不快回憶，佢就笑笑口講：「夠喇，我都唔知佢住呢頭。」
至於Niki劇中老爸秋官就力撐「愛女」，佢話：「Niki係可愛女仔，一埋位就入戲。」噚日無綫仲送咗兩籃生果慰勞佢哋，不過秋官就好抵死咁玩番特首曾蔭權喺議事廳俾黃毓民掟蕉單新聞，秋官邊派蕉邊話：「特首都食蕉，大家食蕉啦。」
對於周麗淇指同嘉穎仲有聯絡，嘉穎噚日回應話：「要講嘅已經講晒，呢件事應該告一段落，我唔想再糾纏落去，我冇嘢可以再回應啦！」