明明係鬥快過終點，《越野風暴》官網居然將隻Game定性為異種格鬥類，你就知開發同玩者，個個根本不在乎點樣入彎快人零點幾秒，𡁻低對手先係重點所在。新作《太平洋裂縫》將暴力美學推上高峯，加入歐美最得寵嘅大腳八，宣傳相全部係轆過、踩爆對手嘅畫面，睇見呢隻惡嘢打橫行，又真係幾興奮喎！
文：之達
攝影：譚盈傑
隱藏秘道一味靠撞
幾年前《越野風暴》由一間不知名細公司EvolutionStudios開發，賣到今日仍然打得入家樂福、沃爾瑪熱銷榜，幾百萬隻銷量拍住《MGS4》，最後連SONY全球工作室總裁都玩到唔停得手，索性成間公司收歸旗下，都咪話唔厲害。
新一集《太平洋裂縫》金碟熱辣到港，梗要搶先試一試；由上集北美荒野到今集太平洋熱帶叢林Feel，賽道由8條Double至16條，火山、懸崖、叢林應有盡有，鬥車環境更為多變。雖然只得四款車俾你揀，尚未Unlock最想試嘅大腳八，不過揸番用開嘅車，反而可專心喺新版圖上搵捷徑抄路，更佩服四周物件嘅超高互動性，我就符碌試過跟喺架大牛龜油車後面，準備開Boost爬佢頭，點知佢向住倔頭路炒埋去，我仲以為今集電腦AI依然咁笨，最後居然俾佢撞咗條隱藏捷徑出嚟，揚長而去，我梗係靜雞雞緊跟其後啦！相信呢隻Game入面仲有大量呢類隱藏通道要撞出嚟，趣味及耐玩性又再提高。
官方好強調更細緻嘅物理運算，如走過濕泥或水氹，都會有唔同程度嘅咬地拖慢情況，更變態嘅係當車手炒車跌出嚟時，會被一堆後車再次撞起、輾過，轉體720幾勻都未落到地，好變態啫，我都係唔揸爬雞喇！
全球同台劈車
《越野風暴》系列咁變態……唔係！應該話佢咁熱鬧，同電腦鬥邊夠過癮㗎，Online梗係必然㗎啦，不過舊作玩分區，亞版、美版、日版車神溝唔埋，搞到個Server靜蠅蠅無人同你玩。好消息係續集打破地域界限，唔理你乜版本，全部Group埋同一個Server，話唔定學埋《MGO》咁可以插旗組隊，兩幫16人廝殺互踩，齊心合力夾爆對手，肯定更為熱鬧過癮！
比上集另一突破係可分割畫面雙打，甚至一機四打都仲得，雖然畫面細咗，背景多邊形亦會縮水無咁靚，不過當大家互相俟住打機，殺聲震天時，仲邊有人留意遠處棵樹少咗兩塊樹葉吖！開Party互片固然過癮，就算一家人閒來齊齊發洩，有乜事都喺隻Game度解決，真喺家庭糾紛都少啲呀！
《越野風暴：太平洋裂縫》
遊戲類型：越野賽車/異種格鬥
對應機種：PS3
遊玩人數：1-4人（支援Online對戰）
開發商：EvolutionStudios/SCE
售價：未定（11月20日推出）
