懷有6個月身孕的張燊悅，昨日大肚後首度公開亮相。增磅10磅、雙下巴兼肥手臂的她，依然貪靚穿3吋高高跟鞋，她更剖白早前經常被拍到搭地鐵、在中環亂逛，原來是想做運動練肌肉和體能，以便將來自然分娩，真的用心良苦。
現年32歲的張燊悅去年11月嫁予全國政協委員楊孝華的次子楊哲安，火速造人成功，現已懷有近6個月身孕，老公楊哲安任職教育局政治助理，月薪達13萬多元，張燊悅當然更加專心陀仔做闊太。
懷孕後甚少出席公開活動的張燊悅，昨日與汪詩詩、洪欣和名媛邱李茂琪等，在中環出席GiorgioArmani推出的名貴黑曜石精華素宣傳活動，腹大便便的張燊悅，自爆重了10磅，現場見她雙下巴、肥手臂，但仍然十分貪靚，腳踏3吋高高跟鞋，相當危險。
保持心靈平靜
張燊悅辯稱說：「我好快唔着㗎喇！」榮升闊太兼懷孕的張燊悅，身份提升，只在台上接受提問，對於她早前被發現和老公搭地鐵、中環行街，她說：「𠵱家想做多啲運動，因為想自然分娩，我成日喺中環行吓街、坐吓地鐵、周圍行截車，就係想將來方便自然分娩。不過我又怕狗仔隊，要keep住心靈上唔好咁緊張先得。」
側瞓搞出頸紋
至於預產期，張燊悅透露在下年初，她說：「農曆新年左右，希望可以趕到𢭃利是。」男定女？她笑笑口說：「我唔話畀你哋知，其實醫生都話未100%肯定，想畀個surprise自己。」她更謂大肚後要打側瞓，搞到出現頸紋，要小心塗護膚品和保護皮膚。
此外，邱李茂琪掛在口邊開畫展多時終成事，她說：「下個月喺維也納開畫展，會有15幅作品左右，𠵱家市道咁差，賣唔出都唔緊要，有人睇就得，我都係平常心。」
採訪、攝影：RitaLeung