周潤發與林青霞繼1986年合作過《夢中人》後，22年來都沒有合作，最近青霞表示有意復出拍片，發哥知道後十分雀躍，表示希望能再與她拍戲，但過份裸露的場面就不敢接拍，因「兩股」不復當年勇。
周潤發昨日應香港藝術發展局電影及媒體藝術組主席杜琪峯之邀，在尖沙嘴文化中心為第四屆鮮浪潮短片競賽記者會造勢，該計劃主要培育有潛質的新導演與編劇，希望可透過這些短片競賽發掘到幕後人才。發哥一直希望影壇可培養到新血，所以他對這個競賽十分支持。
渴望再演港產片
對於近來影業陷低潮，發哥都很有興趣回歸拍港片，但一切要視劇本質素，如果有導演撮合他與青霞再度合作拍片，他會相當感興趣，發哥說：「喺《夢中人》同青霞拍過好激嘅裸露床上戲後，其實我同青霞冇合作過啦。近來都冇碰過面，但最近佢出席紐約影展，仲好靚同瘦，以佢嘅狀態，再拍100部戲都冇問題，如果有啱嘅戲，我都想同佢再合作，不過就唔會考慮拍好似《色，戒》呢類大膽戲，你估仲係以前拍《夢中人》嗰時嘅狀態咩。𠵱家年紀大啦，皮都皺，兩個股都唔得啦。」
睇好夏雨做視帝
對無綫劇集一向甚捧場的發哥，近期有留意《萬千星輝頒獎典禮》的入圍名單，在最佳男主角提名者中就較為看好夏雨，最佳女主角就較喜歡李司棋和關菊英（大公仔），發哥說：「我覺得夏雨幾好，郭晉安都唔錯，女主角就睇好司棋姐，咁大公仔都唔錯。」
此外，問到發哥在金融海嘯下有沒有損手？他笑說：「冇，我唔玩股票嘅，但老婆有買，但佢多數買有實力嘅股票，好穩陣，不過聽講啲朋友有損手，但好彩冇買雷曼迷你債券，其實買股票最好係用多餘錢買實力股，千萬唔好借錢買股票。」
行政長官曾蔭權昨日發表的施政報告，發哥說：「我覺得最好先搞掂最低工資，今日毓民喺立法會掟蕉太激啦，表達意見係好，但唔應該動手。」杜琪峯被問到對施政報告有何看法？他說：「我覺得應該增加生果金到一千蚊，老人家係要照顧嘅，對呢份施政報告，我根本就冇期望，所以唔會失望。但今日睇到黃毓民掟蕉，我就覺得唔係幾好，始終立法會有本身秩序。」
採訪：魯萍 攝影：陳俊強
