轆Book：<br>獅城測試　劈格四驅七人車好扭

轆Book：
獅城測試　劈格四驅七人車好扭

上個月尾新加坡車展，睇車展之餘順道試咗富士最新嘅兩部車，唔使講梗係最Hit嘅Exiga同埋四門版嘅Impreza喇！七座MPV車型嘅Exiga喺車頭加個氣口，成副戰鬥格，若然用嚟載一家大細，細路肯定GoGoGo叫個不停，老人家實睬你都儍，唔通想掟散副老骨頭咩！

記者、攝影：梁美甜
鳴謝：MotorImageHK

Exiga─仲有Turbo版

富士嘅Exiga以及四門版Impreza遲啲都會先後引入香港，兩者之間較引人注目嘅，絕對係七座Exiga，無他，誰叫呢部七座車係富士自家開發車系。測試嘅2.0i入門版本，同代理明年2月引入嘅2.0GT版本唔同，差個Turbo，多77匹馬力囉！雖然話係入門版，副偈都依然係同Impreza、Legacy一樣嘅2.0公升引擎，但性能就稍為調低，馬力輸出達148匹以及運轉至3千零轉就可以全數輸出191Nm扭力，搭配四前速Sportshift自動波箱，配合全新DynamicChassisControlConcept及SI-Drive系統，人少少嗰陣無論起步、加速、入彎，表現爽快利落，掟個彎返嚟坐多幾個人到Full-load嗰陣就稍為吃力，好彩新車配有四驅功能，勝在扭力好，就算Full-load入彎都正，比直路加速反應更快更直接，可能換咗Turbo嘅2.0GT就無晒Full-load嘅吃力感，之但係，話晒係七人車，坐得七個人都應該係家庭車喇，一家大細坐齊嘅時候，駕駛者盡可能都係以「安全車速」為上策，開得快俾長輩哦餐懵之餘，「dup」親佢哋都唔好啦。Turbo嘅作用可能係令部車夠力水啲，Full-load時唔會蟻躝咁囉！Exiga最正嘅絕對係佢個無敵大天幕天窗，加上2+3+2劇院式編排，視野開揚無阻隔，夜晚幾排人都可以一齊觀星，不過試呢部無天窗，可惜！

■內裝設計無驚喜，但依然簡單而齊備。

■首部七座Turbo車，三排劇院式座椅，唔怕視野受阻，太矮嘅唔算。

■後排算得上闊落，但唔坐得耐，一般成年人十零分鐘就好出嚟喇。

■駕駛艙空間充足，惟獨唔係ILike嘅電椅囉。

■入門版同引入香港GT版最大分別係有無頭蓋個氣口。

■同樣係三圓儀錶板，加埋鍍銀，夠晒Sharp。

■16吋輪胎唔算大，中規中矩囉。

Exiga2.0i規格

引擎：1,994c.c.直四
馬力：148ps/6,000rpm
扭力：191Nm/3,200rpm
傳動：四前速自動波，四驅
尺碼：4,740×1,775×1,660mm
軸距：2,750mm
車重：1,520kg

■掀背式上落大件物品都方便容易。

Impreza─全新四門房車

品牌旗下另一款全新車系就係四門版Impreza，房車格局比Hatchback來得順眼之餘，同WRX、GT相比，只係差咗個頭蓋跑車格氣口，車廠亦識趣地為四門版車系加裝咗原廠包圍，外觀上依然煞食有台型。預計今個月會引入嘅四門Impreza有兩個型號，分別係2.0R以及WRX2.5兩款，馬力輸出分別達150匹及230匹，就連扭力亦可達196Nm及320Nm，差個Turbocharged，性能即時高下立見，但以一部房車嚟講，就算係入門版嘅2.0R都好，都好夠用喇。
當日測試嘅係入門2.0R版本，話就話係入門版，但兩公升水平四汽缸引擎搭配有四前速Sportshift自動波箱，車身輕，加速表現唔叫兇猛但依然順滑有力，高速入彎時好似就甩就甩，最後都可以遵循指示入回車道，可見車身剛性還好。對車迷嚟講，最驚喜嘅絕對係WRX2.5會有五前速手波版本，鍾意玩棍仔嘅人等多一陣子就可以見到佢哋真身喇。

■尾箱擾流有助減低風阻，營造跑味。

■內裝鋪陳其實同五門掀背版一樣。

■2.0公升引擎搭配四前速Sportshift自動波箱，馬力輸出都有150匹。

■四門版比五門長身，內櫳更見使。

■前座用上跑桶椅，承托力十足。

■包圍連頭燈、霧燈，神氣。

Impreza2.0R4DR規格

引擎：1,994c.c.直四
馬力：150ps/6,400rpm
扭力：196Nm/3,200rpm
傳動：四前速自動波
尺碼：4,580X1,740X1,475mm
軸距：2,650mm
車重：1,360kg