李司棋早前被指拍攝劇集《溏心風暴之家好月圓》時，不滿林峯開工遲到，經常打機，更向高層投訴，李司棋前晚跟林峯在慶功宴上碰頭，二人十分好傾，以行動闢謠，李司棋更當面大讚林峯乖仔。
李司棋、關菊英、夏雨、林峯、米雪和陳法拉等，早前主演的無綫劇集《溏心風暴之家好月圓》收視報捷，無綫總經理陳志雲前晚自掏10萬港元宴請台前幕後約80人吃西餐。眾演員都舉杯暢飲，林峯還與陳志雲搭膊頭碰杯。
碰杯有傾有講
有消息指拍攝《家》劇時，李司棋向高層篤林峯背脊，指他開工遲到，經常打機，二人前晚在慶功宴上碰頭，有傾有講。拿着紅酒的李司棋取笑飲雜果賓治的林峯：「你今晚唔飲酒好唔啱。」
心情大靚的李司棋更滿場飛，她又大讚林峯：「佢好乖仔，直腸直肚，好過好多人，唔會掩飾。其實佢打機全部人睇到，點叫篤背脊，廠上面都有人睇晒廠裏邊情況，我試過拍《真情》時都俾珍姐（曾勵珍）開咪鬧我哋玩。」
「尹佬快出院」
林峯也否認跟李司棋不和，他說：「年年台慶前都有呢啲新聞，我請大家手下留情。劇集拍完，觀眾鍾意就得，角色都為我締造咗歷史性一刻。」
米雪早前仍在內地工作，前晚趕回來出席慶功宴，對於男友尹志強被傳鼻咽癌病情告急再度進院，米雪說：「你哋唔使問我，我自己講，報道誇張咗，由頭到尾唔係癌症，只係後遺症，見報後好多親友受到騷擾，佢接受普通後遺症小手術，𠵱家虛弱啲，休養緊，希望你哋畀啲空間佢，我代表佢嘅家人多謝大家關心，就快可以出院。」尹佬可否進食？米雪說：「暫時食唔到嘢住，完全冇事。」
採訪：卓寶花
攝影：陳志嵐、娛樂突發組
