邊個女仔唔想做公主？有白馬王子追求唔使做就有人養？我係女仔，細個都幻想過做公主，但幻想會隨年紀幻滅。呢一代20歲出頭嘅女仔呢？誇到自拍艷照放上網，有網友視呢班患「公主病」嘅女仔為笑柄。你話佢哋唔知醜？佢哋不知幾Happy。開心，原來真係咁簡單，自稱公主就得㗎嘞，問你服未？
記者：許維雅
攝影：梁細權、楊錦文
虛擬世界建自我
《新香蕉俱樂部》主持Ben同Bob好唔話得，笠假髮黐假眼睫毛，模仿小公主攞膽艷照。影完相，佢哋語重心長話：「做人應該將自信帶返現實，呢班公主淨係識幻想，最後只會落得被淘汰下場。」佢哋做節目，晚晚同少女解困，都聽過「公主病」呢個名詞，Ben：「有六成14至24歲嘅女仔有公主病病徵，無讀書又唔肯做嘢，返工呻辛苦，做半日工就辭職，又投訴男朋友畀零用錢少，用錢衡量男朋友有幾愛佢。」Bob：「父母溺愛係主因，同埋網絡太發達喇，佢哋根本唔需要同外界溝通。呢班女仔通常外表無咁出眾，成日俾人笑，唯一自豪自信只建立喺網上世界，現實生活？佢哋係Nothing，即使喺網上面俾人鬧，佢哋都搵到自己存在價值。」
社會新一代出現大斷層，價值觀被扭曲，根本積習難返，Ben認同：「好難從虛擬世界拉番呢班公主返嚟咯，呢個社會變得精英制，一班人肯學肯由低做起，另一班人唔肯做又覺得全世界欠咗佢。」淨係識發公主夢尋開心，絕對唔係好事，「如果佢哋可以將自信帶返現實世界就係好事，一個人有自信，永遠係最靚嘅。」
現實世界變鵪鶉
世界尖酸刻薄，網友鍾意評頭品足，喺網絡世界可以充滿自信，但一返到現實社會，部份公主會自信變自大，部份會自信變自閉。應用社會科學系副教授何國良博士又咁睇：「肯自戀，起碼係做人態度嘅一種自我肯定。少女愛發夢係好事，話畀人聽自己靚無罪，如果佢哋肯踏出一步，企番出現實社會證明自己，咁香港就會好喇。」
點解公主鍾意自戀？「因為佢哋喺現實世界裏面無人讚賞、無能力、無寄託，連同人溝通嘅能力都無，鵪鶉程度好可怕，有人甚至連搭小巴都唔敢開聲嗌落車。其實成班公主匿埋一堆，話就話自得其樂，但自己話自己係公主，根本無意思，因為網絡世界無真假對錯，反而玩Cosplay嗰班年輕人，佢哋嗰份專注同自信，先值得讚賞。」批評公主，已經成為衰仔網友免費娛樂，「大眾慣咗對少數族群打壓，呢種價值觀好唔要得，批評人之前應該反思美嘅觀念。」
公主幫一盤生意
19歲加拿大留學生Jennifer喺6月成立「HIME公主幫」，自封幫主，架構有多名公主、御前總管等，Facebook內有過千會員，網站更會教人點襯衫、售賣公主精品服飾，宣揚只要肯打扮個個都可以做公主呢個訊息，「做公主係夢想，我希望利用呢個Trend創下自己嘅Business，令所有少女都可當公主。」唔淨止上網發夢，將夢想變自己事業，HIME的確值得香港少女借鏡。
街訪：總有公主喺左近！
想知自己有無公主病？得，學呢班受訪少女咁，一齊玩以下心理測驗啦。
1.你喜歡那款床帳？
米黃色喱士邊床帳→2
粉紅色布紋細長珠簾→3
2.旅遊想要去那個國家？
馬爾代夫→3
荷蘭→4
3.和身邊朋友爭吵時誰先讓步？
朋友先道歉→6
你先道歉→5
4.是否經常覺得很寂寞？
是，會感到很空虛→5
很少會感覺到寂寞→6
5.甚麼才算得上是孤獨？
身邊朋友很少，沒有人陪→8
身邊很多朋友，卻沒人能理解你→7
6.生氣時的表現是甚麼？
發脾氣掉東西或推別人→8
冷笑而用不屑一顧的表情對待人→7
7.喜歡甚麼顏色的晚禮服？
黑色→9
紫色→10
8.每年甚麼季節購物最多？
春秋季→9
夏冬季→11
9.一星期不出門，事先準備甚麼食物？
法國長麵包和奶酪→10
蔬菜肉食，自己在家做飯→12
10.現在有投緣的朋友嗎？
有，很有默契的相處着→15
身邊沒有這樣的人選可以做朋友→11
11.在異性面前你的形象是怎樣的呢？
古靈精怪的可愛型→13
聰明卻柔弱的女生→12
12.你喜歡看那類型電視劇？
美國系列片→13
韓國的戀愛劇→14
13.怎看待自己的計劃？
一定要實現到底→15
只要能夠接近完成，就可以了→14
14.權威人士的觀點，你怎樣看呢？
可信度值得推敲→B
絕對相信→C
15.你對別人對你的批評怎樣看？
根本不能夠發現你真正的才能→A
針對他們評價，反觀自己的能力→D
分析
A.患嚴重公主病，你自戀、孤芳自賞，覺得沒有人明白你。
B.任性公主型，渴望別人呵護，孤獨又唔肯放下身段與人交往。
C.不算公主病，不過鍾意依賴人，對生活有夢想但未盡努力實現。
D.理性，任何事都會分析利害，有公主病性格但能夠自我控制。
分析B
Irene未做測驗，身邊同學已經大笑，佢直認不諱：「個Test好準，有時我會覺得孤獨。女仔有公主病都係父母寵壞啦，因為全世界都咁做，所以公主咪好緊張打扮囉。」
分析D
Michelle聽到何謂公主病、少女自戀成風，反應極大，「嘩！係呀，好難頂呀！我一定唔會Post自己啲相上網。好佩服佢哋嘅自信，唔鍾意咪唔好睇囉。」
分析B
Mabel暗示身邊有呢類同學，「倒模式公主打扮、心形嘴，不過想引人注意。你越唔鍾意咩，班公主就越想引你注意，根本係個惡性循環。」
「美女」圖庫
相信你都收過唔少Forwardemail，內載各大討論區貼圖或少女Blog等嚇人自拍照，豬扒索女充滿自信齊齊Showoff，符合晒公主病第一病徵「自認為很美麗」。衰仔網友恥笑作樂，不留情面抵死抨擊，笑爆嘴！
（ http://evchk.wikia.com/wiki/%E5%85%AC%E4%B8%BB%E7%97%85）
1.樺公主Blog
睇到呢個Blog，我愕晒然O晒嘴，台灣少女作風果然大膽。呢個Mindy，喺Blog裏面貼出多張自拍照，懶理其他人批評，更寫上「不喜歡就別進入」字句，自信一面表露無遺。（ http://www.wretch.cc/album/album.php?id=mindy1980082&book=13）
2.甜甜圈
好多成員放近照貼上呢個網，無錯有美少女，但比例小，絕大部份公主都好掯好難頂。（ http://www.wretch.cc/album/album.php?id=zzz1236987&book=40&page=1）
3.高登網
喺高登網，有班衰仔網友發起「好懷念之前高登女神級Model──絲露」話題，笑絲露係外星人，唔化妝好過化妝，攞佢啲公主自拍相Key嚟Key去，當網上吹水娛樂。（ http://forum7.hkgolden.com/view.aspx?message=1395951）
網友批評
純瘦師：「由此可見唔係所有女仔適合影大頭照。」
花生商會主席：「今次真係不安。」
秋來也秋去：「佢個口可以掂到耳仔。」
一步一生：「真係睇一次笑一次。」
4.相機發燒友網
唔少相機發燒友網站都附設自拍專區，方便網友分享自拍照、交友、討教拍攝技巧，不過班女靚唔靚，就真係見仁見智咯。（ http://www.dcview.com.tw/gallery/showmsg.asp?msgid=730638）
