經過一輪休假充電，又喺早飛倉同大家見面；周中打叠第2輪世界盃外圍賽，上周六有表現球隊，相信唔會太大走樣，一於博俄羅斯返主場揚威，大炒芬蘭開「讓球主客和」「主勝」。
小弟上周六睇住德國對俄羅斯直播，俄軍一分都冇真係好唔抵，艾沙維同普格恩耶克呢對箭頭腳風好少少，隨時反勝德國都唔奇；今次返回莫斯科火車頭個地獄主場，之前對威爾斯已經壓住狂攻，小勝2:1全因欠運，信軒廸克唔會連續兩次失威，大炒在望。
芬蘭表現欠說服力
為咗做足功課幫各位讀者，小弟特登上網睇番芬蘭對阿塞拜疆精華，唔睇猶自可，一睇把幾火，芬蘭對住呢隊「爆漿」，射門係就係多，但腳頭無靈，靠科素射入12碼先僅僅贏「爆漿」一球。
芬蘭到今時今日仲要靠希比亞、泰尼奧等過氣英超兵，門將積亞基連倫踢保頓又失波失到暈；而往績上俄羅斯又「食」到應芬蘭，歷來13次對碰俄羅斯（連同蘇聯）取得9勝4和，周三喺莫斯科大炒在望。
美國超班可贏千里達
本欄嘅渾水摸魚過關未試過中晒，今次熱熱地整條3串1，希望可以開齋；俄羅斯主W固然穩陣，美國喺中北美洲外圍賽又係大超班，難得美職聯打到火紅火綠，程拜仁、當路雲等國腳前鋒狀態大勇，作客都有權贏千里達，美國客W可取；而希臘對瑞士嘅歐洲區第2組大戰，雙方防守力都出色，博入球「細」好過。
〈早飛倉〉
主菜：星期三5俄羅斯勝[-1]（1.95）@1,000
渾水摸魚過關：星期三5俄羅斯勝（1.3）x星期三19希臘細（1.7）x星期三31美國勝（2.05）3x1@500
今日早餐價錢：-$1,500
上日賺蝕：-$2,500
早飛倉結餘：$90,635
規則：$100,000本錢，每日買早餐最多動用$5,000，最少$1,000，逢周二、五起身食早餐。
難啃早餐
星期三24 塞浦路斯勝[+1]（2.85）
一向對愛爾蘭教練查柏東尼冇好感，塞浦路斯已非昔日魚腩島國。
周中早飛超級重心
星期三2 日本勝[-1]（1.95）
日本徵召中村俊輔、長谷部誠等外流精英，主場對青黃不接的烏茲別克，以烏軍友賽都輸3粒畀南韓，日本可望大勝。
星期三14 克羅地亞勝[-3]（1.65）
克羅地亞連吃英格蘭及烏克蘭兩記悶棍，但基本陣容仍在，安道爾勢成出氣袋。
星期三33 墨西哥勝（1.75）
加拿大與中北美洲區一線球隊仍有距離，墨西哥剛不敵牙買加，爭出線沒有失分空間。