今日不再有人挺扁，但阿根廷就唔怕再「挺」一會！周三世盃外南美洲區，剛終止4場外圍賽不勝的阿根廷，作客有4名主力缺陣的智利，再下一城好輕鬆，1.7倍客W，再翻兜畢傑上次命中的2:1波膽。（球賽編號：星期三28；有線61台明日7:15am直播）阿呢斯奧
由阿根廷教練比爾沙，率領智利倒戈甚具瞄頭，可是要在祖國身上偷雞，似乎機會渺茫。智利在外圍賽近況飄忽，對上5場3勝2負，大炒哥倫比亞4:0後，去仗又作客僅負厄瓜多爾0:1，而且今仗更有兩名悍將富安廸斯和查拉雙雙停賽，守力受損，最重要是由烏甸尼斯外借至河床的前線尖刀阿歷士山齊士，聯同中場施利斯達累積夠黃牌，亦要坐波監。讓足車馬炮，談何贏波？
阿根廷前場甚惡
阿根廷外圍賽迄今戰績是9場4勝，去仗由美斯和阿古路各入一球，2:1贏烏拉圭，比數未足以反映球隊勇態。事關球隊早早領先兩球，只因受制於對手「要人唔要波」的狠辣踢法影響，不敢再把比數拉開，以免「為國捐軀」。
儘管前鋒泰維斯和中場列基美停賽缺陣，似乎略存暗湧，惟以美斯為首的攻擊手如廸馬利亞及廸亞高米列圖，狀態不俗腳風順，而賽前有微傷的阿古路，亦應無礙披甲，前場陣容鼎盛；為應付不時之需，主帥巴斯利更補選了國內球員荷西辛特，代替泰維斯的位置。
叨畢傑旺氣博贏2:1
再者，由於阿根廷在早前外圍賽連場失分，導致巴斯利備受輿論揮鞭狂插，故此今番正好乘勝追擊，企圖盡快重上榜首，減輕肩上壓力。智利大本營士氣低迷，比爾沙揚言今仗會作大變陣，以懲罰去仗未能踢出水平的國腳，而球隊歷來面對阿根廷亦甚少創造出爆冷戰果，近4次主場更錄得3負。同事畢傑滿身旺氣，當然要叨叨光，取阿根廷客W之餘，亦可博翻冧2:1波膽，自己則會揀多個2:0。
星期三28
智利vs阿根廷 1：2
半全場：客/客
盤口：智利[+1]
讓球主客和：D和局