轆book：揸車抵過逼巴士<br>三菱電車男

轆book：揸車抵過逼巴士
三菱電車男

男人養車如養妾，朝思夜想、萬般呵護，多多錢都願意使。可恨油價咄咄逼人，就算二奶唔大食，個幾兩蚊一公里油錢，對打工一族嚟講條數依然好襟計。日本下年正式量產嘅純電車三菱iMiEV，就比混能更慳油更環保，除番條數只係$0.4/km，令你荷包堅韌度比其他車主多三倍，分分鐘抵過你逼巴士。

記者：徐影龍
攝影：譚盈傑
Model：Chris@StageModels

充電成本低至$0.4/km

其實三菱早喺七十年代已研發用電力發動嘅汽車，仲以EV為代號（ElectricVehicle），實驗過嘅名車有EvoEV、FTOEV等型號，到今日成個計劃終於落實喺可愛小車iMiEV度，世界各地包括巴黎、倫敦等相繼試驗可行性，日本仲Plan好09年中正式量產投入街道，港代理亦開始做嘢，同政府傾緊牌費、叉電站等細節，預期能跟日本同步推出。
豐田混能越做越成熟，牛龜咁重嘅大凌竟可慳至$1.4/km，而寶馬七系嘅氫氣車造價雖貴，但廢氣變水排出，對環境零污染，兩者各有所長。三菱iMiEV可謂集兩者之大成，廢氣CO2排放近乎零，充電成本更低至$0.4/km，比一般私家車足足平70%！由以往揸車貴過搭的士，到不久將來可以平過搭巴士，一眾車主毋須再搖頭嘆息喇。

三菱iMiEV（到港日期、售價待定）

■多咗個B波（Brake），落斜時靠個轆轉動而順便叉吓電。

■純電推動，撻車無聲無打冷震，車廂特別寧靜。

■iMiEV改至電油版i仔，圓潤Cute爆。

■三腳叉頭可直駁家中15m拖板叉電，只要夠長。

■無咗死氣喉，成個世界亁淨晒。

■電動摩打收埋喺尾廂底部，唔阻你擺嘢。

用電上斜一樣有力

可能你擔心，電車就好似食粥一樣，飽完好快會餓，兼且無氣無力；iMiEV全叉要7粒鐘，官方數字行160km（日本110V則需14小時），嫌慢可以快叉，30分鐘QuickCharge，足夠行85km路程，大約等於來回將軍澳屯門，仲要係駁屋企用開嘅15m三腳頭就叉得，方便！
至於實際性能同操控性，其實有驚喜，引擎先天設計上，電摩打扭力比汽油偈大一倍，達到180Nm，車仔細細上斜韌力居然咁堅，對香港嘅城市環境肯定佔優，而且極速可達130km/h，揸到爆錶已經超咗速。充電池同摩打擺晒喺車底，反而令佢變成低重心，直路狂飆穩定、掟彎咬地。純電版其實比汽油版優點多出一籮，剩番車價問題，不過代理唔肯講賣幾錢，日本亦未公佈，某啲車網估價400萬日圓，到港後連埋稅咪60萬？