一班民粹政客，孫柏文唔講邊個黨，大家心照，多年來不斷要求政府落實「市民嘅第一訴求」。雖然個訴求，係會改變對特區非常重要嘅市場結構，不過因為民粹政客追求已久，所以已達「不會理其他因素，係咪都要」嘅地步。同一時間，政府又冇足夠民意基礎去反對，所以就啓動官僚機器去起草政策，落實訴求。
金融動盪仍難煞車
點知，喺官僚機器完成起草政策，已放入特首施政報告時，國際金融業大動盪。不過因官僚機器有如火車頭，要煞停談何容易，施政報告嘅讀稿已印萬份，唔通逐份用塗改液改咩？所以就算特首知道，呢個係改變市場結構嘅最壞一刻，後遺症可能一發不可收拾，都要硬着頭皮宣佈落實訴求。
施政報告被逼落墨
之後政策出台，處處碰釘。出事後，政府為咗要全世界知道佢哋仲有管治能力，無寶不落咁繼續推。最後不但害咗全個特區，傷勢最嚴重嘅仲要係當初政策想幫嘅人。最無賴嘅係，原先嗰班民粹政客，居然當自己冇要過呢個政策。
97年，「樓價高企」、「無殼蝸牛」嘅民粹哭訴不絕。特首董建華喺當年10月嘅施政報告，宣佈八萬五政策。今年特首曾蔭權，又喺金融海嘯中面對「在職貧窮」、「可恥薪金」等聲音。未來嘅歷史學家一定會咁話：「08年最低工資，就係97年八萬五。」
孫柏文
http://phatdat.blogspot.com