郭富城同女友熊黛林（Lynn）嘅戀情可謂撲朔迷離，之前盛傳佢哋分咗手，Lynn上星期28歲生日，仲口口聲聲話冇約城城，點知轉個頭夜晚就帶埋愛犬，揸車去咗城城屋企過夜，一過就過咗溫馨33個鐘頭，不過溫馨過後，城城一直冇公開露面表態，承認Lynn女朋友嘅地位。
心情好現笑容
噚日城城終於現身，為佢喺呢個星期六喺上海舉行嘅演唱會綵排，佢先去九龍灣同樂隊練歌，排咗足足幾個鐘，到傍晚時分就坐保母車去灣仔排舞師SunnyWong嘅排舞室綵排。城城叫助手視察下現場情況至落車，佢戴住紅色cap帽、着住黑色演唱會tee同埋黑超，估唔到唔見幾日，城城雙頰瘦到凹晒，個人又好亁咁，唔通係同Lynn溫馨過後搞成咁？不過城城心情靚絕，面帶笑容，馮仁昭問佢阿Lynn上去佢屋企過夜算唔算承認佢女友地位，佢聽到之後只係笑而不答，仲加快腳步行入大廈，不過睇佢春風滿面，答案都已經好明顯。
到夜晚8點幾，城城排完舞離開，佢同舞蹈員講咗句：「上海見啦！」之後就急步跳上車離開。