由港人研製嘅LPCD喺05年面世，06年底開始普及，到現在百花齊放（仲未知LPCD係乜東東可以到我個Blog重溫！），但好多人都問咁多款LPCD，係咪全部都咁靚聲？我相信無本雜誌夠膽答咁敏感嘅問題。
近母帶原音色
坦白講，當然無可能啦！本地一般嘅流行曲錄音邊有咁多靚錄音呢？首先要明白LPCD作用係令大家聽到最接近原母帶嘅音色，錄音本身夠水準的話，LPCD音效自然會比CD靚得多，相反錄音本身無乜特別，聽LPCD同聽CD就唔會有太大差別，例如陳奕迅、張偉文或尹光嘅LPCD，Sorry！個人認為唔值得畀多一倍錢去買囉；近期LPCD值得推介者係《OldiesforaRainyDay》！
音色脫胎換骨
全隻碟15首都係有幾十年歷史嘅經典英文老歌，連最早期嘅立體聲錄音都有（即係啲樂器各自分開喺左右兩邊聲道出聲），呢堆老掉牙嘅金曲俾人翻過N咁多次落雜錦碟度，錄音質素係點大家心中有數！但呢隻LPCD確令我邊聽邊有驚喜，尤其是聽到一首又一首從前炒晒豆、雜訊勁多嘅歌仔，如今脫胎換骨、背景寧靜兼音色變得清純。
金嗓子重現
你聽頭一首《WhatAWonderfulWorld》可能會話原曲本身都靚聲，LPCD好聲有幾出奇？聽到第3首《StandByMe》你又覺得點呢？係咪感覺良好呢？以前聽SkeeterDavis唱《EndOfTheWorld》嘅雜音多到耳仔唔舒服，如今聽LPCD先清清楚楚聽到佢把甜到漏嘅嗓子。我當然唔會話呢張係發燒天碟，但音色改善之大，值得打開銀包支持囉！
文：李廸偉
http://hk.myblog.yahoo.com/reviewcd