一些年後，當我們想起劉德華，肯定是金句：「今時今日咁嘅服務態度……」情同吳楚帆：「食碗底反碗面」。
朋友邀約探訪他們幽靜山林間新居。途經火炭，見九萬年前來過吃乳鴿雞粥的大牌檔仍然存在，本來應享受溪泉林木伴陪家常飯，變了體會老牌大牌檔吃在小巴站旁風味。意念不錯，又可親近今天香港官員得閒無事做，左活化右發展終於搞出大頭佛四不像而民生親近的舊時風景，ie大牌檔則買少見少，最終人間蒸發。只見七時多一大片燈光火猛幾乎座無虛席，氣氛好到加零一更添食慾。一眾商號名字求平實不求突出，惟「泰源」的菜牌寫得有心思，遠遠看過去黑白紅分分明明，幾分相似已作古九龍皇帝曾灶財況味，為此加分；店員阿叔又十分熱情招呼；一面拉客一面游說：「哥仔坐低呢度咪好囉，正㗎；送碟椒鹽瀨尿蝦過你哋送啤酒啦，吓……？」
事實一行五人大家都不熟悉環境無特別choice或偏好，放眼望去家家同樣標榜雞粥乳鴿，大同小異，相信品質也亦接近；見「泰源」阿叔推銷賣力，如不坐下也不好意思。看菜牌，無特別菜式吸引，見套餐牌上有乳鴿有雞粥有西蘭花魚球青菜……388元，另加亁炒牛河三數十元，平均一人不用一百，甚便宜，阿叔更說送炸饅頭，不喜歡白菜仔換菜心啦……大人大姐食量有限，貪送咩？嗱，菜點好了，阿叔轉身，問他廁所方向，轉過來似說：「超，乜話？」隨便指指算過；咁絕情㗎，陳世美啊！
瀨尿蝦一直未浮過頭，炸饅頭也去如黃鶴，白菜仔依然白菜仔，不見菜心蹤影，師傅（味精）落得不亦樂乎，飯未吃過半已見口亁牙痛後頸痠。嘆一句：今時今日咁嘅服務態度點得啊？