有如女性嘅「下墮」疑慮，「退地」危機乃男性一輩子煩惱。英格蘭球星朗尼年僅22歲，但已深陷危機之中，日前索性引刀成一快，喺世盃外對哈薩克前鏟掉煩惱絲，以類似萬人迷碧咸嘅光頭look示人，清風送爽，即以「新銅頭」頂入頭槌，睇嚟朗尼不久就有「新朵」誕生！
光頭新look頂入波
西方人可能比較早熟，歐洲球壇唔少球員年紀輕輕，就面對脫髮危機嘅嚴峻挑戰，好似國米中場甘比亞素甫出道，已十足十40、50歲大叔，老氣橫秋，實難想像𠵱家仲未夠30歲。講番英格蘭球壇，前威爾斯國腳赫臣可說係「退地王」，成名時已備受「地中海」困擾，而曼聯兼英格蘭經典人物卜比查爾頓嘅「怪俠一枝梅」髮式，更成「一代標誌」。
珠玉在前，朗尼當然希望追逐前輩嘅顯赫成就，惟絕對唔想「有樣學樣」，只可惜身體髮膚受諸父母，自己無得選擇；今年先得22歲，朗尼近年嘅髮線疾走向後移，眾人皆見，佢亦唔係掩耳盜鈴之人，於是把心一橫，遲早有日無晒，倒不如一剪而後快，以光頭仔形象面向世界，痛痛快快，扮一休和尚又唔使食齋，而且自己仲攞埋「頭彩」，真係一石二鳥！
做梗生髮水代言人
首次喺比賽以全新形象出現，朗尼整場喜氣洋洋，場中所見與同樣係光頭嘅碧咸相映成趣，而個人更頂破哈薩克大門，笑到見牙唔見眼。此時此刻，唔少生髮水廣告湧上求大俠腦海，如無意外，應該唔少生產商已對光頭仔虎視眈眈，準備搵佢做代言人。
畢竟朗尼係全英未來支柱，一改形象後，震撼唔少，而英國《每日鏡報》更選出近年「最佳光頭陣容」，入圍者包括巴夫斯、保特及林巴度等，朗尼屹立之中，更見光頭嘅可愛；而外國網民亦議論紛紛，GunnerGirl08話：「Ouch，呢個look查實好難望多過兩秒！」MrBlackett則比較正面：「朗尼終於接受現實，一次過剃晒未嘗不是好事？」