今季本地甲組新軍屯門普高，未開「咧」已被認定為魚腩部隊，冇辦法啦！球員全無甲組經驗，球隊基地又遷去深圳，除咗十個八個全職球員有宿舍外，其他業餘球員每日要山長水遠北上練波。求驗客好奇問過佢哋嘅顧問任煒雄，得出回應係：「貪嗰邊生活指數低，球員衣食住行都可以輕鬆啲。」唉！咁樣又點會練到好效果呢！
吞蛋門將百般滋味
經過5場聯賽後，屯門普高輸晒不特止，得失球更加係入1球失28球嘅驚人數字，平均計每場波輸5.6球。《球迷大聯盟》網友frankng心水清，特登搵齊戰後近50幾年嘅本地甲組球季統計，發現全季聯賽失球最多嘅球隊，係54/55球季嘅海軍，全季24場波失147球，即平均每場失6.125球，多過屯門普高少少。
雖然，任顧問話佢哋班球員好年輕，冇乜心理包袱，輸幾多唔重要，仲用「鋼鐵就是這樣煉成」嘅理論去比喻。不過，佢自己都係守門員出身，如果場場波都被派半打雞蛋，同你守龍嗰個真係百般滋味在心頭。
破單季失147球紀錄？
仲有，以前海軍一季失147球，多少與五、六十年代足球唔打防守有關。嗰時隊隊波都踢2-4-4，加上當代前鋒人才濟濟，好似南華嘅姚卓然、莫振華、何祥友「三條煙」，以及東方何應芬、侯澄滔、朱永強嘅「三劍俠」，弱旅一季輸過百球有乜出奇。
但係現代足球注重防守，屯門普高場場咁樣俾人數8球、9球，唔用「渣」去形容，真係搵唔到其他藉口。
足總今季話一定會執行升降制，以屯門目前咁嘅成績，再冇改善就真係一季拜拜降落乙組。屯門普高今個禮拜五又有比賽，對手係今季未贏過波嘅淦源，攞唔攞到佢哋甲組第1分就唔敢講，不過，失球數字估計會少過平均數。最後，希望呢班98年攞過第一代青苗冠軍、04及06年球季贏過丙組冠軍嘅甲組新丁，餘下嘅甲組日子可以爭爭氣氣，埋單計數時唔好打破海軍半個世紀前嘅失球數字，咁就還得神落喇！