十個打工仔，九個返工如上刑場，有嘢做忙到趴街，無嘢做悶到抽筋，即係有無嘢做都有壓力。開會咩？仲弊，老闆有老闆噏，你有你遊魂，唔想放蚊，又可以點樣集中精神呢？專家教路，原來靠自己一雙五姑娘已經減到壓，玩手指減壓，原來Work㗎。
記者：王震遠
攝影：王文忠
模特兒：Yu、Freddy@PureModel
鳴謝：臨床身心行為學家李寶能
全腦訓練
小朋友先會玩手指？咁諗大錯特錯，原來大人或細路，一受壓力或者腦筋實晒，都會忽然手痕想玩手指，臨床身心行為學家李寶能話：「古代已經有中國人嗜好單手轉合桃，原理同轉筆一樣，利用離開心臟同腦部較遠嘅手指，透過遠端活動去活性化大腦，平衡腦部壓力。」無聊問，咁腳趾得唔得？「無問題，不過手指可以玩多啲花款咁囉。玩手指屬於全腦訓練，可以平衡左右腦。舉個例子，作文作到個腦實晒，手就會自然做動作平衡番，情形就好似幫個腦做Massage；又或者咁講，腦充滿血液，想排洪就郁手指，郁得多，就有排洪作用嘞。」估唔到由細玩到大嘅無聊玩意，竟然蘊藏醫學價值，香港人，學嘢啦！
咬指甲
咬手指甲可以減壓？李寶能：「係，咬手指嘅人大致可以分兩類，一類性格執着，唔鍾意指甲長，一覺得指甲有些少突出就想咬平佢；另一類人不知不覺間咬手指，當過度專注一件事時，下意識就會去做一啲平時理性抑制嘅行為。」但點解會有呢個下意識呢？「下意識，即係透過行為幫助分擔身體不安情緒，人一專注，就會將不安轉移去隻手度，平衡番壓力。」
玩盡原子筆
阿豬阿狗都識轉筆，但坊間有班轉筆達人玩得仲Pro，搞埋學會開班授徒，上網唔難Search到大堆轉筆短片。專門轉筆同無聊拎上手轉幾嘢，減壓功效有無分別？「達人玩得專注，轉得叻過人，會有更多成就感；一般人視轉筆為遊戲，旨在參與，成功同失敗都唔會有壓力。」咁又係，我開會轉筆都係純過手癮。「所有遊戲都可以紓緩情緒，所以刻意轉筆可以減壓。」
啪手指
坐辦公室，久唔久會聽到啪啪聲，唔止我，原來好多同事都鍾意啪手指，係犯賤㗎，不過心癮難耐，硬係要啪番兩三下先有Mood再做嘢，「啪手指，由卡住啪唔到，到啪得出聲呢個過程，人會從中得到快感。啪手指係挑戰係禁忌，衝突禁忌有成功感，雖然好微細，但都紓緩到情緒。不過我絕對唔鼓勵，因為會傷到骨膜。」
喪拮五指關
《庶務二課》裏面班OL無聊等運到，會攤大手掌放枱面，用筆喪拮手指罅，咁做減唔減到壓呢？「性質同攰得滯用凍水洗面一樣，抽離苦悶處境，係種活動性興奮劑，可以激活腦停滯同得到快感。」驚拮親手指點算？「驚住嚟玩，唔可以舒壓，當遊戲咁玩先可以平衡鬱悶，但玩得越多，舒壓效果越差。」
自轉孖指
玩手指最高境界，一定係自轉手指唔停打圈，既無聊又可以無止境轉落去，李寶能最推崇：「自轉孖指屬於動作療法，性質同耍太極一樣，不斷訓練可以令身心協調，紓緩情緒。另外，有醫學報告話手指帶有經絡，轉手指可以激活身體機能，人係身心相關嘅，調節經絡即係調節情緒，透過運動令體質變好，人自然會開心啲。」上網查一查，中醫都有相關理論，原來五隻手指有六條經脈運行，舉例拇指代表呼吸系統、食指代表消化系統等等，睇嚟以後腳底按摩都可以慳番，轉手指咪得囉。
街訪：玩筆大學生
雖然話玩手指可以紓緩壓力，仲有晒理論兼專家之言，但你平時又有無意識到自己靠五姑娘減壓呢？街訪讀書壓力大過天嘅大學生，只得少數人會刻意啪手指、咬手指、拮手指或者轉孖指，但講到轉筆，就個個都有自己一套絕技，講得咁掂，唔請佢哋即場表演吓都唔得啦。
Sandy用食中二指轉筆，動作純熟：
「上堂間唔中轉筆，唔知點解，下意識啩。」
Sheila淨係識㩒筆，㩒筆速度超快：
「都唔知點解因乜要㩒筆，慣咗手勢。」
王先生鍾意玩水平轉筆，仲自誇永無跌筆：
「無聊咪轉吓筆囉，打發時間之嘛。」
Yammie拇指同尾指㩒實支筆頭尾，玩彈筆：
「無聊不過好玩，玩完會放鬆啲。」
Hyatt玩垂直轉筆：
「諗嘢嗰陣唔受控制，隻手就自自然攞起支筆亂咁轉㗎啦。」
