DIY遊戲LittleBigPlanet　惡搞經典作

L1掣瞄準、R1開槍、L2揀道具、R2換武器．……一隻手得5隻手指，我想打機輕鬆吓啫！PS3今個月嘅大作《LittleBigPlanet》（小小大星球）反璞歸真玩簡易操控；三兩粒掣已掌控遊戲，上網摷料，仲見到有玩家自創關卡，DIY惡搞經典遊戲。我決定，出Game時要創造一個唔使用齊廿粒掣玩嘅《MetalGear》世界！

文：㩒釘華

騷盡機能扮晒嘢

傳聞話佢撈晒搞笑、卡通、冧女各大元素，而且騷盡PS3機能？咪玩啦！點知睇到實Game畫面，唔係HardSell，無論布公仔主角質地，或者背景物件嘅質感同物理運算，都真有其物咁款，有啲料。開波仲可設計角色，又可以邊行邊執新衫換造型，整個恐龍頭俾佢又得，要佢變四眼鬍鬚仔又得，要幾可愛有幾可愛。

講番啲笑料，《小》之前搵咗一班玩家進行封測，點玩法上網大把片睇，不過最正係佢嘅創造關卡玩法，諗得到就整得出，有人惡搞《孖寶兄弟》玩頂磚，又有人扮《俄羅斯方塊》，仲有懷舊《太空侵略者》射怪獸過關！
嗱！我之前話佢係冧女Game，唔係話佢玩法低能呀，係叫你自製甜蜜關卡冧女呀，女友見到畫面裏面隻角色由「I」字跳去「love」字再經過「U」字，你都咪話唔肉麻，不過，冧掂女友之後仲有冇時間打機，自己諗。

■背景同上面可動嘅物件都相當次世代，質感極細緻。

■布娃娃造型可自行設定，呢個中年漢應該幾難相處。

■想換衫轉新Look，就要邊行邊執邊換。

講義氣玩爆相

Online元素好緊要，除咗可以上網玩其他玩家創造嘅關卡，仲可以最多4人合作過關。之前講過背景物件嘅物理運算好堅，例如跳上個波度，跳得唔正失平衡，個波就會向後碌；扯實條樹枝，佢又會彈吓彈吓越扯越跌，加上有大量如飛船、飛行器、滑板等道具，有唔少地方都要靠老友幫手先可以去到終點過關，教識你打機同出嚟行一樣，最緊要義字行頭，俾人賴低好慘㗎！
香港預定今個月同日本歐洲同步推出中英文合併版，唔使對劇情或解謎一知半解之餘，合作時仲可用中文短訊與機友互Chat，對應埋PlaystationEye，行行吓爆張相出嚟又得，影低啲相用嚟做背景圖案都冇問題！