咁多嘢唔講係要講屎？係，要講，仲好有必要講㖭。無錯，屎臭氣熏天毫無價值，係低賤、廢物代名詞，不過無可否認亦係笑聲來源。一篤屎，話到畀你知你承受緊幾大壓力、身體健唔健康，所以唔使避忌，今日，就大大方方擺屎上枱，慢慢講。
記者：吳允冲
攝影：陳盛臣
模特兒：Jack@StageModels
鳴謝：荷花親子中心（28114522）
黃金圖鑑
一日之計在於晨，每朝排毒最醒神。每日坐馬桶，你有無耷低頭昅一昅排洩出嚟嘅廢物？核突？叫你昅金啫，又唔係叫你執金。其實大便形狀、顏色、硬度、氣味都反映到健康同情緒問題，來來來，係時候認識何謂好屎嘞。
1.香蕉好便
特徵：略臭、啡黃至古銅色、硬度如香蕉
解碼：屬最健康大便，份量大概有三隻香蕉咁上下，排出後不浮不沉者，實屬上品。
2.細長黑便
特徵：極級惡臭、深啡色至黑色、軟綿
成因：情緒影響腸道蠕動，排便用力不足，以致擠壓成銀針粉形狀，常見於老人同生活緊張嘅人。
3.石頭黑便
特徵：臭死人、茶色至啡黑色、硬如石頭
成因：人壓力大，多愁多憂多顧慮，飲唔夠水缺乏纖維，亁燥大便停留腸道太耐，屬短暫性便秘。
4.水狀稀便
特徵：臭死自己、黃色、稀如水中間夾雜異物
成因：情緒繃緊焦慮，致令腸道活動不足，未能成功消化食物同水份，殘渣連同水份一齊排出，堆積如山。
5.谷爆黑便
特徵：臭暈人，茶色至啡黑色、硬到難以排出
成因：生活緊張食無定時，腹部成日谷住谷住唔舒服，少便意，新陳代謝差，要靠食瀉藥或便秘藥清腸胃。
6.前硬後軟
特徵：茶色至啡黑色、臭暈自己、前半段亁硬後半段軟
成因：繁忙，經常忍便，屎未能排出所以流失水份，第二次有便意嗰陣，變硬大便連同腸內未消化嘅食物一同排出。
排便必食
要路路暢通，除咗少食動物性脂肪同蛋白質，秘訣係增加乳酸菌同纖維攝取量。食物纖維能夠促進腸道蠕動，帶走垃圾，令宿便唔會積聚，排便增多；乳酸菌則有助調整腸道環境，提高免疫力，建議每日都要補充。
番薯：食番薯會放屁？正確，因為食用纖維被分解會產生氣體。番薯係通便好幫手，幫到你清理腸胃。
水果：蘋果、香蕉含較多纖維，有助帶走腸道垃圾，紅豆、柿子、蘿蔔、提子亁都有相同功效，必食。
乳酪：豐富乳酸菌可改善便秘或腹瀉，減少腸道內壁壞菌兼抑制其增生，持續吃兩星期，功效更顯著。
發酵食物：醃菜、泡菜，甚至豉油、麵豉等經過發酵嘅醬料，都含大量植物性乳酸菌，促進腸道健康。
屙唔出，咪賴地硬！
爆石係人生大事，但唔係人人坐親馬桶都屙得出，屙屎唔出唔好賴地硬，調整生活習慣，包你日日有金執。
1.作息有序，調校好自己生理時鐘，大便最好每朝一次。
2.爆石嗰陣唔好睇書，因為會分散注意力，越踎越無嘢出。
3.爆石嗰陣亦唔好煲煙或傾電話，要專心釋放廢物。
4.多飲水少食肥膩食物，多食沙律、麵包等易消化食物。
5.一有便意就應該踎一踎塔，唔好忍。
做測驗
望聞問切，望完硬唔硬，聞埋臭唔臭，跟住問自己日常生活習慣。以下測驗列舉10項壞習慣，問心，你中咗幾多個？做完測驗，就知自己壓力指數幾高、腸道係咪健康。
□1.如廁時間不定，得閒、有Mood先爆一次石。
□2.正牌煙民，煙不離手，無尼古丁做唔到人。
□3.常放臭屁，仲要寃崩爛臭，自己都頂唔順。
□4.皮膚亁，無彈性缺乏光澤，佈滿粒粒粉刺。
□5.零運動經常坐，一樓都搭𨋢，行步路都懶。
□6.睡眠不足經常捱更抵夜，瞓又瞓得唔安樂。
□7.無早餐癮，一日兩餐狼吞虎嚥，質飽就算。
□8.三餐不定時，餓先食嘢，明知飽又繼續食。
□9.標準食肉獸，最憎食菜，愛大堆頭雜扒餐。
□10.唔飲奶唔食乳製品，慣扒飯盒無屋企飯食。
分析
0項：恭喜你有條好腸，人無壓力精力充沛，「腸青不老」，腸道年齡=實際年齡。
1-3項：開始老化，蠕動緩慢，腹部隆起，唔知仲以為係肚腩，腸道年齡=實際年齡+5歲。
4-5項：「不腸之兆」，糞便積聚谷住個肚，影響身體影響心情，腸道年齡=實際年齡+10歲。
6-7項：腸道健康響起警號，係時候改改生活壞習慣，撥亂歸正，腸道年齡=實際年齡+20歲。
8-10項：壓力超大，腸道腐敗死氣沉沉，唔睇醫生等幾時？腸道年齡=實際年齡+30歲。
屎文化精選
屎，受人嫌棄，但出現螢光幕就令人開懷，千祈咪覺得低俗市井，屎尿屁根本就係香港喜劇核心。九十年代，王晶加周星馳呢對黃金組合，玩屎玩到出神入化，玩屎玩到走入殿堂，一篤屎令你笑多幾聲，忘卻煩憂，壓力少咗脾氣都少咗，係時候跟我講一句：「屎，你真偉大！」
《回魂夜》
Cheap？星爺偏要為屎平反，記唔記得佢同李力持講嘅對白：「係你懶有學識，認為屎就係無聊同埋污穢，就算篤屎唔臭你都一樣睇佢唔起，夠膽你就掂一掂佢。」
《唐伯虎點秋香》
又係無厘頭對白，梁家仁飾演發晒癲話：「人點解要大便？因為人要食飯，所以大便，大便之後又要抹，慘！」可能講出好多人心聲，尤其係班減肥減到便秘嘅OL。
《喜劇之王》
吳孟達飾演嘅警方卧底，借用《屎撈人》主題曲奚落大茄星爺︰「屎你係一篤屎，命比蟻便宜，我揸Benz屎，你挖鼻屎……」鏡頭內星爺一臉無癮，頭耷耷離開，嗰種心酸，睇到人心都噏埋。
《千王之王2000》
周星馳加王晶最後之作，完全唔識賭術嘅張家輝，為求星爺呢個一代千王出山，居然下跪舐黐滿屎嘅功夫鞋。張家輝初頭以為篤屎係扮屎嘅糖，點知原來係真屎！
《百變星君》
星爺版《變相怪傑》，星爺化身百變金剛，用盡發明用屎整蠱人，一開場已經要李健仁連人帶馬桶飛天。
《屎撈人》
謝立文以屎為喻，自嘲卑微，向小朋友揭示社會陰暗面，具沉重哲理。當年Hit到星爺都要喺《喜劇之王》裏面唱佢首主題曲，原唱者劉以達，無人唱得出呢種神韻。
《IQ博士》
屎尿屁又點少得《IQ博士》？小雲篤住嗰嚿粉紅色米田共，有齊眼耳口鼻，應該係第一次以Kawaii造型出現的大便。
