恒指跌穿萬六點，揸住成手蟹貨嘅散戶可以點？有網友喺香港討論區好無奈咁問：「你會點處理蟹貨？」其他網友嘅回應都好無奈，好多人一如henrykuen咁講：「唔login，睇佢唔到。」唔上網，唔睇股價就當冇事？咁即係消極不干預政策啫。solaraixunix睇唔過眼，話呢啲係「老散（即散戶）嘅攞命弱點！」
不過唔係咁又真係冇計，etkin一於「鬥長命，最多一代傳一代。」pb1hk就抱阿Q精神話：「攞埋實物（股票）出嚟，放入夾萬，等下次牛市。」
及時止蝕輸少當贏
股頭草一於學雷曼苦主咁追討，「支持上市公司以我哋成本價回收番啲股票，上市公司出七成、政府出三成，畀番我哋啲直通車苦主。」johnnyC仲狼，「要求政府動用納稅人啲錢包底。」
solaraixunix就將佢嘅經驗話畀大家知：「沽啦！熊市之下，次次回頭望都係正確嘅決定，賬面上係就係輸，點都好過輸到元氣大傷。」