跌市嘅時候，總有秋官嘅劇上演。無綫中午重播秋官擔正做劉邦嘅《楚漢驕雄》，都有成個禮拜，恒指就跌近兩成。𠵱家網友擔心嘅唔只係秋官效應，而係秋官效應會唔會遺傳畀阿女欣宜，事關欣宜幫無綫拍咗套劇就快播，網友擔心「欣宜效應」亦同時上映。
留意有冇女承父業
ghost18503好閉翳問套劇做完時，「你估恒指收幾多點？」paulchen危言聳聽：「下個禮拜加埋秋官個女欣宜套《畢打自己人》，父女雙劍合璧，天下無敵，9000點見。」lajabo插嘴：「下星期父女齊出馬，日間老竇先出，影響亞洲股市，夜晚個女出馬，拖累歐美股市。」easport講：「咁佢兩父女嘅影響力咪席捲全球。」
tempolee話：「到底欣宜會唔會女承父業，創造欣宜效應呢？真係好期待。」pigred覺得：「以前唔信傳統智慧──10月股災、10年一浪同秋官效應──家吓真係信到十足。」