公路股防守性一向較強，但美國次按風暴引發金融海嘯席捲全球的衝擊下，公路股亦捱唔住，一年下來，都跌咗一半有多，不過，相比其他跌幅超過8成或甚至去到9成嘅大價股，總算係跌得較少。
大市風雨飄搖，現時唔係入市時機，公路股亦難保唔會再跌，但已可以留意住，例如個別PE已低到7至8倍，而息率又有5厘以上的，就可趁其再跌之時低吸，揸一年半載，穩穩陣陣賺番兩至三成。
一年前，深高速（548）企喺9.50元水平，噚日3元大關又再跌穿，較一年前高位跌近7成，去番兩年半前水平，現時往績PE8.9倍，息率6厘，已開始有吸引力，2.80元係重要支持位，若然跌穿，則到2.50元就可以慢慢收集。
08年（12月年結）的上半年，深高速收入17.57億元人民幣（下同），升6.3%，獲利2.84億元，減2%，每股盈利13分，不派中期息。集團盈利主要來自收費公路的經營和投資，期內中國經濟增長放緩、發生重大自然災害，以及執行綠色通道免費政策（鮮活農產品運輸車輛免費通行至08年底）等，影響業績。
候2.5元收集
目前集團經營和投資的收費公路項目有17個，已營運的15個，在建及改建有2個，主要在深圳，另外在廣東省地區及其他省分，期內大部份收費公路的車流量和路費收入都有增長，其中逾3成更錄得兩位數升幅，但由於天災和政策影響，總體增長已比前兩年放緩。
上半年通行費收入4.6億元，減1.48%，分部業績2.64億元，減9.32%；特許經營安排的建造服務收入12.6億元，升11.3%，分部業績963萬元，減5.38%；工程建造管理服務無盈利貢獻，前同期則有3037萬元；其他服務（主要為廣告）收入2753萬元，升58.4%，分部業績1722萬元，升83.8%。
08年全年，估計獲利6億元，每股盈利27.5分（約31港仙），待股價跌到2.50元時吸入，預測PE為8倍。08年6月底，深高速每股資產淨值3.45元（約3.90港元），股價有折讓，頗吸引。
郭兆誠