小朋友身形暴脹，為人父母通常會想辦法幫仔女減肥，未必會注意佢哋嘅血壓嘅變化，原來高血壓唔止係成人至會有，雖然香港無統計數字，但係美國研究估計有2至5%兒童有高血壓，加埋青少年人口，足足有兩成係血壓超標，所以美國建議三歲開始要量血壓。
高血壓比率有增無減
美國加州大學兒科學系助理教授劉廣洪，喺最新一期家庭醫學雜誌《TheHongKongPractitioner》，寫咗篇有關兒童或青少年高血壓問題嘅文章，提到香港兒童肥胖人口增加，小朋友患上高血壓嘅比率都會有增無減，但係香港好多醫生都無替細路仔量血壓嘅習慣，好多時要等到有大病做檢查先發現，就延遲治療。
小朋友因為成日坐唔定，要確診高血壓唔容易，𠵱家醫學界用嚟評估兒童高血壓嘅標準，係血壓持續係最高1%嘅兒童屬高族。但有專家講過，細路血壓指標同大人唔同，成人上壓120mmHg非常理想，但12歲以下兒童血壓115至118已經偏高，3至5歲有110mmHg已經係高，所以最好定期俾醫生檢查血壓。
如果家長要幫小朋友量血壓，之前一定要佢哋最少坐定五分鐘，雙腳要掂住地下，量血壓嘅時候手臂要有承托，放係心臟水平位置，仲要喺上臂量度，度出嚟嘅讀數至準，最好反覆量幾次。
除咗肥之外，遺傳、食傷風感冒藥、咖啡因、亂食甘草、麻黃、人參等中草藥都會令血壓上升。要控制細路仔高血壓其實同大人差唔多，都係做多啲運動、減肥、戒肥同太鹹嘅食物、食多啲蔬果，唯一唔同嘅係小朋友甚少要食藥控制血壓。
blog主：醫神