原本一心諗住保本，只貪嗰十多廿厘嘅高息，都可以係一個抱憾終生嘅投資陷阱，你話風險管理喺呢個金融動盪嘅亂世幾重要。賭波一樣，不過我向來願賭服輸，大細注也一樣！上次貼列斯聯失手，好在命中雷丁贏3:1波膽將虧損減半，今次仍然可以將賺番嚟嘅錢買波，壓力不大，重心推介比利時大炒阿美尼亞。
爭次名出線冇手軟
國際賽日，勸大家無謂大注，一來遙遙長路，列強唔憂追唔到，莊家又開得辣，賠率早已反映晒，多無肉食；想過關串多幾場熱W，通常都會有一兩場全日大冷戰果出現，呢個世界冇焗賭嘅，你唔貪心冇人𠱁得你落叠，所以小注分散投資成本周策略。
國際賽決定應吓景，改用近年有復蘇迹象嘅比利時，主場大炒阿美尼亞，信心非大，只用一般注碼出擊。目下國腳多躋身大球會，包括後防高柏尼（曼城）、華美倫（阿積士）同雲拜頓（拜仁），中場有西蒙斯（燕豪芬）、費蘭尼（愛華頓）及國內聯賽射手桑克（布魯日）及廸科爾（標準列治）；今屆處身世盃外歐洲區第5組，同組包括出硬線嘅西班牙，還有同比利時拗手瓜嘅土耳其及波斯尼亞，應要及早發力爭次名出線更實際。
今次對手阿美尼亞屬歐洲魚腩，翻查上屆外圍賽6仗作客5對強隊全部大敗，今屆首次作客亦淨吞西班牙4蛋，比利時今場只要全心撲擊對手，暫拋開下周三迎西班牙嘅大戰，1.8倍嘅「主勝」穩開，決單注出擊。
再追列斯聯本利歸還
另一注博番列斯聯，上周六敗走彼得堡後，周中踢盃仔收起包括入球機器碧福特嘅正選雙箭頭，又2:4輸畀乙組洛達咸，擺明要留力在英甲聯賽搏殺；今迎今屆作客未敗、兼有英超中場硬漢沙維治壓陣嘅白禮頓，單W只得1.6倍熱透，我決大膽博2.65倍嘅「主勝」，上周之失，決要大莊本利歸還。
近5場往績：LWLWW
蘋果波神
水準有目共睹，長跟必有着數。