無綫80集長劇《珠光寶氣》即將播映，昨日一眾演員齊集為該劇造勢，不過女主角黎姿和蔡少芬卻缺席活動。李司棋笑言異常入戲，更跟劇中角色一樣，患上老人癡呆症，皆因拍該劇期間又要拍攝《溏心風暴之家好月圓》，令她相當混淆。現場播出朱慧敏在劇中以三點式色誘陳鴻烈的片段時，也令全場嘩然。
台慶劇《珠光寶氣》本月20日首播，昨日一眾演員在黃金海岸宣傳，包括李司棋、邵美琪、陳豪、林保怡、姜大偉和朱慧敏等，他們逐一講述拍攝時的難忘經歷，現場更播放預告片讓大家先睹為快，當大家看到朱慧敏穿上三點式爬到床上，依偎在陳鴻烈肩上時，在場人士不停喧嘩尖叫。
司棋被嘲老人癡呆
朱慧敏說：「嗰日我都有黐膠紙，不過甩晒，其實最初劇本冇寫話我要着三點式，不過導演叫我自備，話拍我游水，點知佢真係拍。」李司棋在台上被問到最難忘的事，最初她推搪說要其他人講先，之後有人提起司棋姐被淋紅油，她才搶着說：「係呀，我最辛苦係俾人淋紅油，我拍嗰時又話要喺漆油入面加油加麵粉，多多意見。」
事後司棋姐說：「又《珠光寶氣》又《家好月圓》，太多喇，真係唔記得晒，我知道係有兩場拍得好辛苦，但係真係唔記得另一場係乜。」說罷她向姜大偉求救說：「你記唔記得我點解俾人淋油？應該係因為啲女，唔係，係咪你欠人錢？」姜大偉說：「你入晒戲，戲入面最後佢係有老人癡呆症，𠵱家佢做番自己。」之後李司棋說：「係呀，都應該好難好番。」
保怡黑眼袋嚇親人
《珠光寶氣》不乏外景場面，原來每次拍外景，陳豪都會充當住家男做大廚，焗製美食給一班同劇演員，陳豪說：「我喺澳洲整開BBQ，去到法國整BBQ加埋法國紅酒最正，法國紅酒求其拎起一支都好飲，仲要唔使100蚊港紙。」林保怡則全程戴黑超，原來是想遮眼袋，他說：「我驚嚇親細路，GiGi（黎姿）成日叫我搞搞佢，我都要同佢傾吓，如果打針就唔使，男人有皺紋仲型，最緊要係演戲，唔係要靚仔。」
採訪：楊潔雯
攝影：黃偉雄