早兩日收到老友露比嘅求救電話，喘晒氣咁初時仲以為佢有乜嘢意外，原來係睇電視有關。佢話有個推銷員上佢屋企拍門，聲稱話大廈委託佢為住戶安裝高清機頂盒，如果唔安裝嘅話，呢個月就連四個免費電視台都睇唔到。佢仲話因為技術問題需要成幢大廈一次過處理，又講到只可以用某幾個支援大廈訊號嘅機頂盒牌子，仲逼佢要即日答覆，價錢係2,200蚊。
我鬧鬼佢，呢啲無良推銷員成日呃阿婆，估唔到你啲後生女都受𠱁。我叫佢落樓問大廈管理員，一問就知根本冇呢件事。
消委會接160宗投訴
消委會都同我講，今年頭九個月收到160宗有關機頂盒嘅投訴，大部份都同不良推銷手法有關，好似冒充政府人員同住戶講唔換機頂盒就睇唔到電視，價錢通常要2,000幾蚊。喺度再提醒大家，其實去到2012年先換高清電視都未遲㗎！
電郵：mailto:[email protected]
逢周六、周日刊出