究竟遊戲展點先叫好睇？一堆畫面靚絕遊戲？對要求越來越高嘅機迷已經無甚吸引力，好彩仲有Wii！雖然任天堂照舊玩失蹤，不過各大遊戲商照樣發功，將唔少好玩過癮兼具創意遊戲展出，畫面比唔上PS3？唔緊要，睇場中玩家玩得咁開心，就知好玩程度啦！
記者、攝影：許福合
Highlights
Wii新體驗篇
跟拍盒節奏做反應
Let'sTap 12月推出
曾幾何時，有人以為Wiimote創意用盡，可以宣佈玩完，不過見到呢隻Let'sTap，不禁會講句：「咁都得！」睇畫面，絕對比唔上那些靚到好似電影嘅遊戲，用色、畫面設計都簡單，但玩法就絕對非一般。進行遊戲時，要先將一個盒放喺枱面，再將Wiimote平放在上面，然後用手指打在盒上，畫面上人形公仔就會因應震動及節奏作出各種反應，如向前跑、跳或原地進行特別動作。
現場實在太多人「輪街症」，搞到主辦單位要焗人玩對戰、輸機即淘汰制；其實Let'sTap仲包括多個迷你遊戲，全部係趣味與創意兼備。
唔使篤爆芒太鼓之達人
Wii 12月11日推出
太鼓之達人喺NDS大賣後，呢次輪到Wii版。跟Game將推出專用鼓，以往怕將NDS芒篤爛，今次可打個夠本；鼓嘅手感唔錯，可惜係無聲響，否則仲真實。基本玩法分別不大，並有對戰模式，據知音樂亦會有新歌。
KeepFit夏威夷女郎
HulaWii 10月30日推出
又一款可以用嚟KeepFit嘅遊戲，玩法非常簡單，只要手揸住Wiimote，再學畫面中夏威夷女郎跳舞，就睇邊個學得似！遊戲可以雙人對戰，初期舞曲一般比較慢，現場見機迷試玩，個個打到KickBoxing咁，都真係幾搞笑！
Wii威上老牌名作
溝薩爾達操控翻啅
MonsterHunterWii 2009年推出
PSP上熱爆芒亨，09年將推出Wii版，配合Wii手掣操控上特性，亦加入不少新玩法，而整體操作有點似薩爾達傳說，可能要花時間熟習；場景新加水中狩獵舞台，要顧及移動之餘，仲要做潛、浮，而水中怪物就係一條水龍，難度相當高。
打到好似睇動畫
BLEACH死神：對決十刃 12月8日推出
今集已經同一套漫畫於Wii上推出嘅第二集，遊戲畫面會使用3D戰鬥場景，配合相當多動畫及以Wiimote作格鬥，玩落感覺玩緊龍珠一樣。遊戲後期可以轉為多名角色戰鬥系統，耐玩性更高。
執乜上手都照毆
DeadRising:ChopTillYouDrop 2009年推出
雖然屬Wii版本，但保留了DeadRising風格，Fans玩落絕對可以Feel到，尤其任可物品包括食物可以用來攻擊，當然多類型高殺傷武器亦唔會缺少，並且可利用Wiimote作瞄準及射擊，比原作更有特色。
XB360NewGame
日系RPG吸客作
TheLastRemnant 11月27日推出
近期XB360推出不少日系RPG，TheLastRemnant故事背景在幻境世界，主角可以與同伴組成隊伍作戰，配合運用魔法，除可快速消滅敵人外，亦可享受到極佳視覺特別效果。
無雙加盟XB360
高達無雙2 12月18日推出
第二集高達無雙將會有PS3及XB360版，高達無雙2於強化原有機體動作外，亦有加入新機體，如自由高達等，另外敵人之中亦會出現體形同火力都超強嘅MA，更為考驗玩家反應。
飛簷走壁科幻忍者
NinjaBlade 2009年推出
NinjaBlade於今次TGS首次發表，主角屬於忍者類型，但又於高樓大廈外與怪物戰鬥，從現場試玩，流暢度同畫面都不俗，不過對於新發表作品，能否趕及下年推出真係好大疑問。
