Halloween就嚟到，四周圍都鬼聲四起，城大近日傳出有邪嘢消息。話說城大幾個月前發生意外，一名裝修工人不幸俾塌牆壓死；事過境不遷，有人同八方講，坐喺意外現場附近嘅職員心緒不寧，成日形住office入面有啲嘢咁，甚至影響工作。校方為安撫員工，建議佢哋調位避一避，詎料反而鬧出更多風波。
借用活動室暫避
校內空間有限，八方聽聞城大高層要求學生會暫借兩間活動室，供國際及外地學生處做臨時辦公室，學生會商量後，認為現時活動室都唔夠用，同學想借用都要排長龍，外借畀校方做辦公室，變相剝削同學福利，可能有好多反對聲音，惟有sayno。點知托校方手踭有手尾，近日有同學向校方借用其他活動室時，無端端好多阻滯。
有學生質疑校方玩小器，既然有人怕鬼，一於搞到你見光死，學生報出版號外踢爆事件，笑校方怕鬼兼有打壓學生會之嫌，校方怕鬼咗班學生，借活動室之議不了了之。城大發言人否認職員調位係要避污糟嘢，表示事情已經解決。