財爺曾俊華噚日朝早話現時只係海嘯前奏，即係經濟最差嘅日子仲未到，幾個鐘頭後，負責預測本港經濟趨勢嘅政府經濟顧問郭國全就公佈辭職唔玩。家陣風高浪急，高官忽然跳船，莫非意味香港經濟前景真係冇眼睇，走得快好世界？
海嘯殺到走得快
人稱KC嘅郭國全04年10月被委任為政府經濟顧問，係首長第四級高官，月薪近15萬元，合約為期兩年，06年再續兩年。據了解佢早前向政府請辭，答應待政府搵到接班人至起身，今次離開政府，可以話係和平分手。
KC噚日解釋，有感做咗經濟分析呢行多年，係時候思考未來做乜。雖然佢唔係公務員，但離職後一年內有新工作，都要政府審批，一年後先正式恢復自由身，但佢冇透露日後去向。金融海嘯殺到埋身，KC話香港隔幾年就發生一次金融災難，港人身經百戰，只要唔好自亂陣腳就可安然度過。
鬍鬚曾噚日表示對KC離職深感惋惜，讚佢態度專業，工作投入，畀到佢同政府莫大支持同信心。話雖如此，政府內部對KC評價卻唔係一面倒，發展局局長林鄭月娥早前不點名批評KC計數唔準，推算通脹數字有誤差，局方向立會申請撥款後，因通脹令建築成本上升而要追加撥款，費時失事又要向議員解多次畫，林鄭咁唔客氣，差在冇講到出口話有人累街坊啫。
預測經濟唔多準
八方翻查資料，發現KC過去幾年預測經濟眼光，同十分受市民愛戴嗰啲風水堪輿運程星相大師不相伯仲，真係信則有，不信則無。以反映經濟增長嘅本地生產總值為例，05年佢預測增加4.5%至5.5%，結果增長咗7.3%；06年預測增加4%至5%，結果增長咗6.8%；07年佢睇升4.5%至5.5%，揭盅增長率卻達6.3%。
其他預測都差唔多，05至07年通脹率，佢預測分別係1.5%、2.3%、1.5%，結果實際通脹率係1.1%、2%、2%，總之就信唔過，唯一可以信嘅，就係唔好信政府啲預測數字。經濟環境瞬息萬變，預測經濟數據係高難度動作，難過天文台預測颱風走勢，KC選擇唔撈，可能係佢計算得最準確嘅一次。
郭國全11月1日會正式離開政府，佢下屬首席經濟主任陳李藹倫會頂上。呢位陳太現年46歲，1986年加入政府由經濟主任做起，官場中人指佢經驗不成疑問，至於對經濟預測會唔會準確啲，呢啲嘢，點講得準㗎！
mailto:[email protected]