聲稱被銀行、金融機構欺騙嘅散戶日日上街，民建聯又獅子開大口要求政府包底賠償，唔少市民質疑有人輸打贏要。有人就喺網上發起「反對苦主惡行」遊行，原定今日上晝喺中環滙豐總行出發，巡迴中環各大銀行，再去政府總部遞請願信。
據知搞手已向警方申請遊行，但後來突然褪軚，警方發言人表示，之前接獲有人申請舉辦上述遊行，但噚日接獲書面通知，申請人話取消遊行，即係今日遊行告吹。八方噚日嘗試聯絡遊行搞手查詢，但未獲回覆，不過網友上街熱情不減，已經諗出好多抗議標語，「反對政府強迫銀行包底，漠視銀行小股東利益」、「未投資，先求知」及「雷曼暴民得人驚，政府見到面青青」等，可惜暫時未能派上用場。