我個friendSunny上星期日同八個friend去海洋公園哈囉喂，嗰日朝早勁落雨，但公園話晚上照開，買咗飛唔可以改期。一張飛400蚊，成班夾埋幾千蚊㗎，佢哋惟有照去。
點知入到去開始落雨，越落越大，無瓦遮頭，擔住遮都變落湯雞，鬼屋又分佈喺山上同山下，就算入到鬼屋，地下濕𣲷𣲷，最搞笑係見到有隻鬼喺度拖地，咩mood都冇晒。
透明雨褸竟賣25蚊
佢哋之後見到攤位遊戲嘅職員，攞堆便利雨衣出嚟，即係成個透明膠袋嗰種，以為佢畀啲客遮雨，點知職員大叫：「落雨呀，快啲嚟買雨褸呀，25蚊一件呀！」趁「雨」打劫咩，呢啲雨褸平時喺便利店賣幾蚊咋，但冇帶遮嘅焗住買。
另外，有網友就email畀我，話10月6號喺哈囉喂畀鬼「打」喎，佢同個friend掂吓隻嘩鬼，點知隻鬼打佢喎。雖然隻鬼打人唔啱，但我覺得呢個網友無端端走去掂啲嘩鬼，又真係唔係咁好嘅。
海洋公園就話，所有嘩鬼演出前都會受訓同聽取指引，唔會對賓客粗魯。佢又話，嗰件雨褸一直都係賣25蚊喎，冇坐地起價。大家可以睇吓幅相，評吓件褸值唔值啦。
電郵：mailto:[email protected]
逢周六、周日刊出