立法會議員宣誓正式就職後，60個議員陸續完成申報利益程序，尊貴議員素來不乏身家豐厚富豪，金融界寶哥哥係銀行話事人，自由黨個個都荷包脹卜卜，八方噚日翻查資料，發現新丁議員都唔惹小，雖然唔可以同富豪相提並論，但都頗有家底。近期金融海嘯掀起危機一浪接一浪，香港雖然未至於百業蕭條，但壞消息陸續有來，相信唔少議員都同一般市民一樣，身家不能倖免要縮水。
法律超人最多物業
議員受公眾監察，要申報持有幾多物業、擔任乜嘢受薪職位等，20個新丁、翻叮議員中，有13人報稱持有物業，當中以「法律超人」謝偉俊一枝獨秀，名下物業遍佈香港、美國、澳洲同內地，共有27個之多，可見佢生財有道，難怪被釘牌都冇有怕。
「老鼠芬」梁美芬係法律學者，但原來鍾情投資物業，申報喺西半山、新界西同九龍西三區各有兩個物業，連埋城大、仁大教書同區議員收入，堪稱小富婆。民建聯李慧琼係會計師，報稱同老公共同擁有三個物業；陳克勤有樓喺馬鞍山，而且已經贖回，你話加入民建聯幾好呢！葉劉就有三個物業，仲有每個月四萬幾蚊長俸收入，加埋議員酬金，月入超過10萬銀。
樓市逆轉身家縮水
上市公司老闆譚偉豪申報只有一個物業，同時係48間公司董事，係新晉「董事王」；會計界陳茂波係美心集團退休金計劃受託人，下屆或者可以改選飲食界；「疑似中共黨員」曾鈺成名下冇物業，係「無產階級」。
近月樓市逆轉，揸住多個單位嘅議員，身家亦隨之縮水，一般估計個市仲有得跌，相信呢班立法會有樓之人，比起陳淑莊、何秀蘭同黃毓民等「冇殼」一族，心情冇咁輕鬆。甘乃威去年底賣樓套現籌錢參選，當時樓市處於高位，本應慶幸及時甩手，可惜佢幫襯渣打買入50萬元ELN（股票掛鈎票據），至今蝕咗七成半，佢話自己都係金融風暴苦主，所以對其他輸身家散戶感同身受，眼白白見住身家大蒸發，唔肉赤就假。
立法會新丁物業一覽
謝偉俊：新界2個、港島14個、內地2個、澳洲3個、美國6個
梁美芬：西半山2個、新界西2個、九龍西2個
陳克勤：新界1個
李慧琼：與丈夫共同持有3個
陳健波：港島2個
黃國健：新界區有物業
譚偉豪：九龍區有物業
葉國謙：港島區有物業
黃成智：屯門、元朗各1個
張國柱：香港、廣州有物業
潘佩璆：港島及九龍區有物業
葉劉淑儀：港島2個，新界1個
林大輝：香港、內地及泰國有物業
註：陳茂波、陳淑莊、梁家騮、葉偉明、何秀蘭、黃毓民、甘乃威沒有申報持有物業
資料來源：立法會網頁