中國建築（3311）由1年高位跌咗近乎76%，預期PE講緊4倍幾，開始收集。中國建築阿媽中國海外（688），論實力，足夠有凸。又集團08年半年度（6月底止）純利升咗近4成到2.57億銀，相當唔錯。而祖國宏調，加埋呢期外圍橫風橫雨，唔止內房股，建築股亦冇運行。但要咁睇，10月時分，據外國通訊社話，中國建築估計今年新簽合約按年增加三成。睇嚟短期業務進展，仍然唔錯。再講，隨住香港總投資額高達2500億銀嘅十大基建上馬，加埋為刺激祖國經濟，估計北大人其中一個方向，會喺基礎建設方面諗計。中國建築輕輕分一杯羮，已經可以過渡呢個風雨期，兼且銜接埋祖國另一潮高增長。
保守計數，集團08年度純利增長，只係keep到半年度水平，純利上到5.6億銀，預期PE得4.3倍。現價（1蚊）起個孖到2元，預期PE仲未過雙位數。
長科現金多博倍升
長城科技（074）今年6月底止，手頭現金25.6億銀（人仔．下同），銀貸10.6億銀，手頭淨現金14.9億銀，等於每股1.42港銀，亦相當於長科現價（0.66港銀）嘅兩倍水位。
又集團同期NAV3.5港銀，現價折讓高達81%，折讓水位仲誇張過內房股，有冇搞錯？又長科經過呢期再跌，周線技術指標超賣到不得了（9RSI得番10）。就當博反彈，長科上番每股淨現金值，現價都講緊要翻一番。