為獎勵《溏心風暴之家好月圓》成績彪炳，無綫副行政主席梁乃鵬前晚自掏荷包喺中環永隆銀行大廈嘅頂樓宴請一班幕前幕後工作人員食飯，包括李司棋、林峯、陳豪、徐子珊、關菊英、李香琴、楊怡同阮兆祥等，而無綫高層陳志雲、曾勵珍同樂易玲亦有出席。
琴姐楊怡友誼第一
梁乃鵬預備咗6支紅酒同大家暢飲，飯局未到尾聲，阮兆祥同林峯已經飲到啤啤夫，尤其係盛傳有機會攞視帝嘅林峯，成晚心情勁high，不過原來佢唔飲紅酒鍾意飲茅台，仲猛咁自隊。最搞笑係陳豪同林峯講：「我以過氣視帝身份預祝你今年攞視帝。」然後同林峯隊酒，結果𠱁到林峯鬼咁開心，完全唔為意陳豪其實偷偷用清水換咗手上杯茅台嚟同佢隊酒，結果林峯喺心情極high之下飲到啤啤夫。其實無綫高層一早預計林峯會勁飲，所以已預先叫佢唔好揸車出席飯局，唔使擔心佢飲大咗之後揸車會發生危險。
另外，琴姐同楊怡雖然齊齊有份爭最佳女配角，但飯局中佢哋亦互相祝大家攞獎，真係友誼第一、比賽第二。
