鄭嘉穎與佘詩曼之戀最近鬧得熱烘烘，有說男方是瞞住正印女友周麗淇（Niki）搭上別的女孩子，外間不少人為Niki叫屈，還要聲討負心漢。但一段感情的來龍去脈，始終是當事人比較清楚，為免再令外界諸多誤會，嘉穎最終說出與Niki在半年前已經沒有來往，從來不會一腳踏兩船。 撰文：陳月媚
愛情觀
鄭嘉穎與佘詩曼傳因合拍無綫劇集《法證先鋒II》擦出愛情火花，他與周麗淇一段情隨即宣告結束。鄭佘之戀近期鬧得熱烘烘，更有消息指嘉穎過去5年追6女星，是非真不少，對多位當事人也造成頗大困擾，原本男歡女愛是平常事，但藝人拍拖和分手總愛死口不認，才會產生諸多誤會，反過來令自己的形象受損。
「唔信Niki放料」
其實鄭嘉穎出道至今緋聞不算很多，近年傳得最盛就只有周麗淇一個，但因為傳出他瞞住女方搭上阿佘才會被網民封為新一代賤男，今次他可說是啞子吃黃連，日前他不吐不快說：「近期真係好煩，入行咁耐，我都未遇到過咁多是非，其實感情係好私人嘅事，所以我係好少同人分享。但不實嘅報道太多啦！我只係想大家知道，我從來唔會一腳踏兩船，每次我都係一段感情完咗，先會發展另一段感情，唔會拖泥帶水。」
對於現時與周麗淇的關係，嘉穎解釋：「同Niki初期合作拍劇開始，我同佢係有過一段時間有好密切來往，但大約半年前開始，同佢都冇聯絡啦！直至最近發生咁多事，出於朋友關心，我有打過（電話）畀佢，雖然出面傳出話近期發生咁多事係佢放料，但我唔會相信，因為佢唔似呢種人，娛樂圈係是非圈，你冇可能人哋講乜就信乜，咁講對佢好唔公平，我仍然當佢係朋友。」
欣賞阿佘勤力
至於嘉穎與佘詩曼的關係，之前兩位當事人雖然都沒有承認熱戀中，但他們均不約而同向外表示對婚姻充滿憧憬。阿佘早前被問到與嘉穎的關係時，她頗有保留指將來發展如何就不知道？至於男方的態度，且聽嘉穎說：「阿佘係我嘅好同事兼好朋友囉！咁將來嘅事，天曉得會發展成點咩！所以阿佘咁講有乜出奇，但你問我心嗰句，如果有選擇，我覺得同圈外人拍拖會比較好，因為是非會少啲，但當然有啲事唔係我可以控制到。」
近年來與阿佘傳過緋聞的圈中人有不少，她更被外間封為姣精，究竟在嘉穎眼中阿佘是一個怎樣的女孩子？嘉穎面帶笑容說：「佢嘅私人事我唔多清楚，但佢嘅工作態度我就好欣賞，每次喺現場開工，佢都做晒功課嚟，最難得係有啲動作鏡頭，佢會主動要求親身上陣。」
恩怨篇 忍讓王喜免樹敵
鄭嘉穎與被標籤為麻煩友的王喜合作演出無綫新劇《烈火雄心III》時傳出不和，王喜更公開指自己沒後台，暗諷嘉穎有高層樂易玲撐，又指他是麻煩源頭，所以要避開他，看來兩人不咬弦，並非空穴來風。
究竟兩人是否已達到水火不容的地步呢？嘉穎說：「喺呢行撈咁耐，有幾可會傳我同其他演員不和呀？雖然我同王喜唔係嗰啲收工後會約出嚟食飯嘅私交朋友，但合作上唔算有太大問題，啲人話王喜麻煩，其實佢只不過係一個好有要求嘅演員，所以佢每次喺現場提意見，出發點都係為套劇，我同佢為劇情喺現場會討論，但唔係嗌交嗰隻。」
內向少知心友
對於外界一直指樂易玲偏心他，嘉穎不認同：「其實樂小姐對好多位藝人都好好，邊個藝人有事發生，佢都會特別關心，咁呢輪我咁多是非，佢咪會關心多啲囉！」至於王喜指他是麻煩友、是非源頭，嘉穎似乎絲毫沒介意說：「咁佢又冇講錯，呢輪我真係有好多是非。唉！我都唔想搞到人。」
鄭嘉穎性格一向比較內向和寡言，自築的城牆很高不容易打開心扉與人溝通，所以他在圈中的知心友寥寥可數，除了表弟王賢誌外，平日有交往的就只有幾位無綫藝人，他說：「我性格比較內向，唔係同任何人都可以傾一餐，同林峯、黃宗澤、郭晉安偶然都會約出嚟食吓飯，同佢幾個比較啱傾啲。啲人成日話同行如敵國，但我覺得個電視圈咁大，一個人玩得晒咩！多一個朋友好過多一個敵人，可以忍讓嘅，我都唔會同人嘈。」
展望篇 爭視帝自認陪跑
談到下月舉行的無綫《萬千星輝頒獎典禮2008》，鄭嘉穎憑劇集《與敵同行》獲得提名最佳男主角，問他今年有沒有信心得獎，他說：「冇喎！今年應該係陪跑，因為今年《溏心風暴之家好月圓》風頭咁勁，憑呢套劇提名男主角嘅夏雨、陳豪同林峯，勝算應該比其他入圍者大，所以今年我就冇乜期望啦！其實我都得過呢個獎，自己已經好心滿意足。」
新劇收視差失望
近期嘉穎與郭晉安主演的《與》劇收視和口碑只屬一般，問他可有失望？嘉穎坦言：「係有啲失望，不過套劇出街前，我都知道呢類題材比較冷門，好難大爆，不過我自己演得好過癮，因為以前好少演呢類咁有發揮嘅角色。」
由台灣回流香港發展，嘉穎其實好感謝無綫給予他很多發展機會，但目前的發展尚未達到其目標，他說：「我嘅最終目標係希望將來有一日，可以選擇拍自己喜歡嘅戲，做自己鍾意做嘅事，但𠵱家仲係為生活而做，我都好明白世界冇咁完美，並唔係你想點就可以點，惟有默默去做啦！」
