韓國天王Rain回歸樂壇嘅特輯前晚喺MBC電視台播出,不過收視麻麻只有9.1%,唔單止輸畀隔籬台嘅《神的天秤》(11%)同《VJ特攻隊》(13.7%),連李英愛早兩個禮拜播出嘅特輯都高收視過佢。
Rain喺特輯入面暢談成名前嘅辛酸,仲有佢喺德國拍攝荷李活新片《忍者刺客》(NinjaAssassin)時健身同拍攝花絮,以及首次公開佢創作回顧人生嘅新歌《MyWay》嘅原因。Rain話細個時屋企好窮,試過捱餓五日,當時佢曾埋怨世界對自己太殘酷,仲好後悔冇能力好好服侍當時患病嘅亡母,最後只能夠買即食海帶湯畀佢飲,呢種痛苦激發起Rain發憤。有觀眾睇完大讚Rain嘅特輯感人,仲話佢係做人子女嘅好榜樣。